“பாசிசத்தின் உச்சம்… ஆணவம் அழிவுக்கு வழிவகுக்கும்” – உதயநிதி கைது விவகாரத்தில் தவெக அரசை எச்சரித்த மு.க. ஸ்டாலின்

எதிர்க்கட்சித் தலைவர் உதயநிதி ஸ்டாலின் கைது செய்யப்பட்ட விவகாரம் தமிழ்நாடு அரசியலில் பெரும் பரபரப்பை ஏற்படுத்தியுள்ளது. இந்த நிலையில், திமுக தலைவர் மு.க. ஸ்டாலின் வெளியிட்டுள்ள அறிக்கையில், தவெக அரசின் நடவடிக்கையை கடுமையாக விமர்சித்து, “ஆணவம் அழிவுக்கு வழிவகுக்கும்; தொடர்ச்சியான ஆணவம் அழிவை விரைவுபடுத்தும்” என்று எச்சரிக்கை விடுத்துள்ளார்.

அவர் வெளியிட்டுள்ள அறிக்கையில், காவிரி நதிநீர் உரிமை மற்றும் மேகதாது அணை விவகாரத்தில் தமிழகத்தின் உரிமையை நிலைநாட்டுவதில் அரசு தோல்வியடைந்துள்ளதாக குற்றம்சாட்டியுள்ளார். இந்த தோல்வியை மறைக்கவே, தஞ்சாவூரில் நடைபெற்ற திமுக கண்டன ஆர்ப்பாட்டத்தில் எதிர்க்கட்சித் தலைவர் உதயநிதி ஸ்டாலின் ஆற்றிய உரையை காரணம் காட்டி கைது நடவடிக்கை மேற்கொள்ளப்பட்டதாக அவர் தெரிவித்துள்ளார்.

தஞ்சாவூரில் நடைபெற்ற ஆர்ப்பாட்டத்தில் ஆயிரக்கணக்கான விவசாயிகள், பொதுமக்கள் மற்றும் திமுக தொண்டர்கள் கலந்து கொண்டு காவிரி உரிமைக்காக குரல் எழுப்பியதாக மு.க. ஸ்டாலின் கூறியுள்ளார். அந்த ஆர்ப்பாட்டத்தில் உதயநிதி ஸ்டாலின், அரசின் செயல்பாடுகளை அரசியல் ரீதியாக விமர்சித்ததாகவும், அதற்கு பதில் அளிக்க முடியாத அரசே கைது நடவடிக்கையை தேர்வு செய்துள்ளதாகவும் அவர் குற்றம்சாட்டினார்.

அறிக்கையில், “நிர்வாகத் திறனற்ற முதலமைச்சரால் காவிரி நீரை பெற்றுத்தர முடியவில்லை. மேகதாது அணையைத் தடுக்க முடியவில்லை. விவசாயிகள் வேதனையில் தவிக்கின்றனர். ஆனால் அரசின் கவனம் வேறு விஷயங்களில் உள்ளது” என்று மு.க. ஸ்டாலின் தெரிவித்துள்ளார்.

மேலும், நாளை சட்டப்பேரவையில் பட்ஜெட் தாக்கல் செய்யப்படவுள்ள நிலையில், கேபினெட் அந்தஸ்து பெற்ற எதிர்க்கட்சித் தலைவர் அவையில் இருக்கக் கூடாது என்ற நோக்கத்திலேயே இந்த கைது நடவடிக்கை மேற்கொள்ளப்பட்டுள்ளதாகவும் அவர் குற்றம்சாட்டியுள்ளார். எதிர்க்கட்சியின் குரலை ஒடுக்க அரசியல் நோக்கத்துடன் காவல்துறை பயன்படுத்தப்பட்டுள்ளதாகவும் அவர் கூறியுள்ளார்.

இந்த கைது நடவடிக்கைக்கு எதிராக தமிழகம் முழுவதும் திமுகவினர் போராட்டங்களில் ஈடுபட்டதைத் தொடர்ந்து, நீதிமன்றத்தில் அரசு தரப்பு “விசாரணை முடிந்ததும் விடுவிக்கப்படுவார்” என்று தெரிவித்தது மக்களின் எதிர்ப்புக்கு பிறகே ஏற்பட்ட மாற்றம் என மு.க. ஸ்டாலின் கூறியுள்ளார்.

“விசாரணை மட்டுமே நோக்கமாக இருந்தால் சென்னையிலேயே விசாரணை நடத்த முடியாதா? ஏன் தஞ்சாவூருக்கு அழைத்துச் செல்ல வேண்டும்? ஏன் ஜாமீனில் வெளியே வர முடியாத பிரிவுகளின் கீழ் வழக்குப் பதிவு செய்ய வேண்டும்?” என்று அவர் கேள்வி எழுப்பியுள்ளார்.

சென்னை உயர்நீதிமன்றம் உதயநிதி ஸ்டாலினை விசாரணைக்கு பின்னர் அதே நாளில் விடுவிக்க வேண்டும் என்று உத்தரவிட்டிருப்பது, அரசின் நடவடிக்கைக்கு நீதிமன்றம் கொடுத்த பதிலடி என்றும் அவர் குறிப்பிட்டுள்ளார்.

தொடர்ந்து தனது அறிக்கையில், தவெக அரசு ஆட்சிக்கு வந்ததிலிருந்து விமர்சனக் குரல்களை அடக்குவதற்காக கைது நடவடிக்கைகளை தொடர்ந்து மேற்கொண்டு வருவதாகவும் அவர் குற்றம்சாட்டியுள்ளார். சமூக வலைதளங்களில் கருத்து தெரிவித்தவர்கள், அரசை விமர்சித்தவர்கள், சட்டமன்ற உறுப்பினர்கள், மாணவர்கள், நீட் தேர்வுக்கு எதிராக போராடிய இளைஞர்கள் என பலர் மீது நடவடிக்கை எடுக்கப்பட்டுள்ளதாக அவர் பட்டியலிட்டுள்ளார்.

மேலும், விவசாயிகள் நடத்திய போராட்டங்களுக்குக் கூட எதிர்க்கட்சிகள் தூண்டுதல் அளித்ததாக அரசு கூறியதாகவும், திராவிடர் கழகத்தின் நீட் எதிர்ப்பு வாகனப் பேரணிக்கு அனுமதி மறுக்கப்பட்டதாகவும் அவர் சுட்டிக்காட்டியுள்ளார். இவை அனைத்தும் ஜனநாயக உரிமைகளை ஒடுக்கும் நடவடிக்கைகளாகவே பார்க்கப்பட வேண்டும் என்றும் தெரிவித்துள்ளார்.

உதயநிதி ஸ்டாலின் தனது உரையில் எந்த ஆபாச வார்த்தைகளையும் பயன்படுத்தவில்லை என்றும், யாரையும் தனிப்பட்ட முறையில் குறிப்பிட்டு பேசவில்லை என்றும் மு.க. ஸ்டாலின் விளக்கம் அளித்துள்ளார். அவர் பேசாத கருத்துகளை சமூக வலைதளங்களில் திரித்து பரப்பியதை சரிபார்க்காமல் சில அரசியல் தலைவர்கள் உதயநிதியை விமர்சித்திருப்பது வருத்தமளிப்பதாகவும் கூறியுள்ளார்.

“உதயநிதி தவறாகப் பேசுகிறவர் அல்ல. ஏதேனும் தவறு நேர்ந்தாலும் உடனடியாக மன்னிப்பு கேட்கும் பண்புடையவர். ஆனால் அவர் பேசாத விஷயங்களை பேசினார் என்று கூறி கைது செய்வது அரசியல் பழிவாங்கலின் வெளிப்பாடாகும்” என்றும் அவர் தெரிவித்துள்ளார்.

இறுதியாக, “வாக்குறுதிகளை நிறைவேற்றாமல், விளம்பர அரசியலில் மட்டும் ஈடுபடாமல், மக்களின் பிரச்சினைகளை தீர்க்க அரசு கவனம் செலுத்த வேண்டும். போராட்டங்களில் ஈடுபட்டதற்காக கைது செய்யப்பட்டுள்ள திமுக தொண்டர்களை உடனடியாக விடுவிக்க வேண்டும். ஆணவம் அழிவுக்கு வழிவகுக்கும்; தொடர்ச்சியான ஆணவம் அந்த அழிவை இன்னும் விரைவுபடுத்தும்” என்று மு.க. ஸ்டாலின் தனது அறிக்கையில் கடுமையாக எச்சரித்துள்ளார்.