ஏ.ஆர். ரகுமான் மகன் அமீன் சென்ற சொகுசு கார் விபத்து.. கிண்டியில் நடந்தது என்ன?
இசையமைப்பாளர் ஏ.ஆர். ரகுமானின் மகன் அமீன் சென்ற சொகுசு கார், கிண்டி அருகே கால் டாக்சி மீது மோதியதில் விபத்து ஏற்பட்டது. அமீன் உள்ளிட்டோர் லேசான காயங்களுடன் சிகிச்சை பெற்று வீடு திரும்பினர்.
பிரபல இசையமைப்பாளர் ஏ.ஆர். ரகுமானின் மகன் அமீன் சென்ற விலை உயர்ந்த கார் சென்னையில் விபத்தில் சிக்கிய சம்பவம் பரபரப்பை ஏற்படுத்தியுள்ளது. அதிகாலை நேரத்தில் நடைபெற்ற இந்த விபத்தில் அமீன் மற்றும் அவரது நண்பருக்கு லேசான காயம் ஏற்பட்டதாக கூறப்படுகிறது. இருவரும் மருத்துவமனைக்குச் சென்று சிகிச்சை பெற்ற பின்னர் வீடு திரும்பியுள்ளனர்.
கிடைத்த தகவல்களின்படி, ஏ.ஆர். ரகுமானின் மகன் அமீன் இன்று அதிகாலை சுமார் 3.30 மணியளவில் தனது காரில் நண்பருடன் கிண்டி நோக்கிச் சென்றுள்ளார். அப்போது கிண்டி ஒலிம்பியா டெக் பார்க் சிக்னல் அருகே கார் சென்று கொண்டிருந்தபோது, பக்கவாட்டு சாலையில் இருந்து வந்த கால் டாக்சி வாகனம் எதிர்பாராதவிதமாக மோதியதாக கூறப்படுகிறது.
இந்த மோதலில் அமீன் சென்ற கார் மற்றும் கால் டாக்சி ஆகிய இரண்டு வாகனங்களிலும் சிறிய அளவில் சேதம் ஏற்பட்டுள்ளது. விபத்து தொடர்பாக தகவல் கிடைத்ததும் அடையாறு போக்குவரத்து புலனாய்வு பிரிவு போலீசார் சம்பவ இடத்துக்குச் சென்று விசாரணை மேற்கொண்டனர்.
விபத்தில் அமீன் மற்றும் அவருடன் காரில் பயணித்த நண்பருக்கும் லேசான காயம் ஏற்பட்டதாக தெரிவிக்கப்பட்டுள்ளது. இதையடுத்து இருவரும் காவேரி மருத்துவமனைக்குச் சென்று சிகிச்சை பெற்றுள்ளனர். சிகிச்சைக்குப் பிறகு அவர்கள் வீடு திரும்பியதாக தகவல்கள் தெரிவிக்கின்றன.
இதனிடையே கால் டாக்சியில் பயணித்த பயணி ஒருவருக்கும் காயம் ஏற்பட்டுள்ளது. அவர் சிகிச்சைக்காக கலைஞர் நூற்றாண்டு மருத்துவமனையில் அனுமதிக்கப்பட்டார். மருத்துவ சிகிச்சைக்குப் பின்னர் அவரும் வீடு திரும்பியதாக கூறப்படுகிறது.
விபத்து தொடர்பாக இரு வாகனங்களையும் போலீசார் பறிமுதல் செய்துள்ளதாக தெரிவிக்கப்பட்டுள்ளது. விபத்து எவ்வாறு ஏற்பட்டது, இரு வாகனங்களும் எந்த வேகத்தில் சென்றன, சிக்னல் பகுதியில் போக்குவரத்து நிலைமை எப்படி இருந்தது உள்ளிட்ட பல்வேறு கோணங்களில் அடையாறு போக்குவரத்து புலனாய்வு பிரிவு போலீசார் விசாரணை நடத்தி வருகின்றனர்.
அதிகாலை நேரத்தில் கிண்டி பகுதியில் நடைபெற்ற இந்த விபத்தில் பெரிய அளவில் உயிரிழப்பு அல்லது பலத்த காயங்கள் ஏற்படாத நிலையில், சம்பவம் தொடர்பாக போலீசார் தொடர்ந்து விசாரணை மேற்கொண்டு வருகின்றனர். விபத்துக்கான முழுமையான காரணம் போலீஸ் விசாரணை முடிவில் தெரியவரும் என எதிர்பார்க்கப்படுகிறது.
0 Comments
No comments yet. Be the first to comment.