யஷ் நடிப்பில் கீது மோகன்தாஸ் இயக்கத்தில் வெளியாகியுள்ள ‘டாக்சிக்’ திரைப்படம் ரசிகர்களை கவர்ந்ததா? படம் குறித்த ரசிகர்களின் ஆரம்பகட்ட விமர்சனங்கள் வெளியாகியுள்ளன
இயக்குநர் கீது மோகன்தாஸ் இயக்கத்தில் யஷ் நடிப்பில் உருவாகியுள்ள ‘டாக்சிக்: ஏ ஃபெய்ரி டேல் ஃபார் க்ரோன்-அப்ஸ்’ திரைப்படம் இன்று திரையரங்குகளில் வெளியாகியுள்ளது. கே.வி.என். நிறுவனம் தயாரித்துள்ள இப்படத்தில் நயன்தாரா, கியாரா அத்வானி, தாரா சுதாரியா, ருக்மிணி வசந்த் உள்ளிட்டோர் முக்கிய கதாபாத்திரங்களில் நடித்துள்ளனர்.‘கே.ஜி.எஃப் 2’ படத்திற்குப் பிறகு சுமார் நான்கு ஆண்டுகள் கழித்து யஷ் நடிப்பில் வெளியாகும் படம் என்பதால் ‘டாக்சிக்’ மீது ரசிகர்களிடையே மிகப்பெரிய எதிர்பார்ப்பு நிலவியது. 1940-களின் கோவாவை பின்னணியாகக் கொண்டு உருவாகியுள்ள இந்த கேங்ஸ்டர் ஆக்ஷன் திரைப்படம் சுமார் 3 மணி நேரத்திற்கும் மேலாக ஓடுகிறது.
திரைப்படத்தின் முதல் பாதியில் யஷ்ஷின் மாஸ் என்ட்ரி, அவரது தோற்றம் மற்றும் ஆக்ஷன் காட்சிகள் ரசிகர்களை உற்சாகப்படுத்துவதாக விமர்சனங்கள் தெரிவிக்கின்றன. குறிப்பாக யஷ் மற்றும் நயன்தாரா இடையிலான காட்சிகளும், இடைவேளைக்கு முன்பான அதிரடியான காட்சிகளும் கவனம் பெற்றுள்ளன.
அதே நேரத்தில், படத்தின் நீண்ட கால அளவு மற்றும் திரைக்கதை குறித்து சில ரசிகர்கள் அதிருப்தி தெரிவித்துள்ளனர். சில விமர்சனங்களில் கதை நகர்வு மெதுவாக இருப்பதாகவும், தேவையற்ற நீளம் இருப்பதாகவும் கூறப்பட்டுள்ளது
படத்தின் ஒளிப்பதிவு, பின்னணி இசை மற்றும் ஆக்ஷன் காட்சிகள் பெரும்பாலான விமர்சனங்களில் பாராட்டப்பட்டுள்ளன. குறிப்பாக ரவி பஸ்ரூரின் பின்னணி இசையும், பிரம்மாண்டமான காட்சியமைப்பும் படத்திற்கு வலு சேர்ப்பதாக கூறப்படுகிறது.மேலும், அதிகப்படியான வன்முறை, ஆக்ஷன் மற்றும் சில முதிர்ச்சியான காட்சிகள் இடம்பெற்றுள்ளதால் இப்படத்திற்கு ‘A’ சான்றிதழ் வழங்கப்பட்டுள்ளது.மொத்தத்தில், ‘டாக்சிக்’ திரைப்படம் யஷ்ஷின் மாஸ் நடிப்பு மற்றும் பிரம்மாண்டமான ஆக்ஷன் காட்சிகளுக்காக ரசிகர்களை கவர்ந்தாலும், நீண்ட கால அளவு மற்றும் திரைக்கதை குறித்து கலவையான விமர்சனங்களைப் பெற்று வருகிறது.
0 Comments
No comments yet. Be the first to comment.