மெல்லச் சாகும் தென்பெண்ணை ஆற்றை காப்பாற்ற நடவடிக்கை எடுக்க வேண்டும் - அன்புமணி ராமதாஸ்

சென்னை: கர்நாடக மாநிலத் தொழிற்சாலைகளில் இருந்து வெளியேறும் சுத்திகரிக்கப்படாத கழிவுகளால், தென்பெண்ணை ஆற்றில் ஆக்சிஜன் அளவு 90 மடங்கு குறைந்து நதி மெல்லச் செத்து வருவதாகப் பாட்டாளி மக்கள் கட்சியின் (பாமக) தலைவர் மருத்துவர் அன்புமணி ராமதாஸ் அதிர்ச்சியூட்டும் தகவலை வெளியிட்டுள்ளார். இந்தச் சுற்றுச்சூழல் சீரழிவைத் தடுக்க தமிழக மற்றும் கர்நாடக அரசுகள் உடனடியாக கூட்டு நடவடிக்கை எடுக்க வேண்டும் என்றும் அவர் வலியுறுத்தியுள்ளார்.

0.1 மில்லிகிராமாக குறைந்த ஆக்சிஜன் மீன்கள் மடியும் அவலம்:

சென்னையைச் சேர்ந்த 'பயோசிங்க் இந்தியா' (BIOSYNK INDIA) என்ற தனியார் நிறுவனம் அண்மையில் தென்பெண்ணை ஆற்றில் ஆய்வு ஒன்றை நடத்தியது. சாதாரண நதி நீர் நிலைகளில் ஒரு லிட்டருக்கு 7 மில்லிகிராம் முதல் 9 கிராம் வரை ஆக்சிஜன் கலந்திருக்க வேண்டும் . ஆனால், ஓசூர் அருகே உள்ள கெலவரப்பள்ளி அணைக்கு வரும் தென்பெண்ணை ஆற்று நீரில், ஆக்சிஜன் அளவு வெறும் 0.1மில்லிகிராம் என்ற மிக மோசமான அளவிற்குச் சரிந்துள்ளது தற்போதைய ஆய்வில் தெரியவந்துள்ளது.ஆற்று நீரில் ஆக்சிஜன் அளவு 4 மில்லிகிராமுக்குக் கீழே குறைந்தாலே, அங்கு மீன்கள் உள்ளிட்ட எந்தவொரு நீர்வாழ் உயிரினங்களும் உயிர்வாழ முடியாது [image_S24cPB.png]. தற்போது ஏற்பட்டுள்ள இந்த 90 மடங்கு சரிவு காரணமாகவே, தென்பெண்ணை ஆற்றில் அடிக்கடி மீன்கள் செத்து மிதக்கின்றன . அத்துடன், நீரில் பாஸ்பரஸ் மற்றும் நைட்ரேட்ஸ் போன்ற நச்சுத் திடப்பொருட்களின் அளவு இரண்டு மடங்குக்கும் கூடுதலாகக் கலந்துள்ளது கண்டறியப்பட்டுள்ளது.

நாள்தோறும் கலக்கும் 132.9 கோடி லிட்டர் கழிவுகள்:

கர்நாடகாவில் உள்ள தொழிற்சாலைகளில் இருந்து நாள்தோறும் 132.9 கோடி லிட்டர் சுத்திகரிக்கப்படாத கழிவு நீர் தென்பெண்ணை ஆற்றில் நேரடியாகக் கலக்கவிடப்படுகிறது.கடந்த ஆண்டு (ஆகஸ்ட் 31) கெலவரப்பள்ளி அணையில் ஆய்வு செய்தபோது ஆக்சிஜன் அளவு லிட்டருக்கு 1.3 மில்லிகிராம் என்ற அளவில் இருந்தது . ஆனால், ஒரே ஆண்டிற்குள் அது 13 மடங்கு குறைந்து 0.1 மில்லிகிராம் நிலைக்குச் சென்றுள்ளது நதி எந்த அளவிற்கு வேகமாகச் சீரழிக்கப்பட்டு வருகிறது என்பதை உணர்த்துகிறது .

நீதிமன்ற உத்தரவை மதிக்காத இரு மாநில அரசுகள்:

இதுதொடர்பான வழக்கில், கடந்த 2022-ஆம் ஆண்டு ஜூலை 13-ஆம் தேதி தென்மண்டல பசுமைத் தீர்ப்பாயம் இறுதித் தீர்ப்பு வழங்கியது . தென்பெண்ணை ஆற்றில் கழிவுகள் கலப்பதைத் தடுக்க கர்நாடக மற்றும் தமிழ்நாடு மாசுக்கட்டுப்பாட்டு வாரியங்கள் இணைந்து தீவிர நடவடிக்கை எடுக்க வேண்டும் என உத்தரவிடப்பட்டது. எனினும், தீர்ப்பு வெளியாகி 4 ஆண்டுகள் கடந்த நிலையிலும் இரு மாநில அரசுகளும் எந்தவொரு ஆக்கப்பூர்வமான நடவடிக்கையையும் எடுக்கவில்லை என அன்புமணி ராமதாஸ் கண்டனம் தெரிவித்துள்ளார்.

கர்நாடக அரசின் அலட்சியப் போக்கு:

கர்நாடகாவில் தென்பெண்ணை ஆறு பாயும் பெங்களூரு மற்றும் அதன் சுற்றுவட்டாரப் பகுதிகளில் தற்போது 29 சுத்திகரிப்பு நிலையங்கள் மட்டுமே செயல்பட்டு வருகின்றன. இவற்றின் மூலம் 80 கோடி லிட்டர் கழிவுநீரை மட்டுமே சுத்திகரிக்க முடிகிறது. முழுமையாகக் கழிவுகளைத் தடுக்க பெங்களூருவில் 10 புதிய சுத்திகரிப்பு நிலையங்களும், பிற பகுதிகளில் 12 புதிய நிலையங்களும் அமைக்கப்பட வேண்டும் . இதற்குச் சுமார் ரூ. 5,000 கோடி நிதி தேவைப்படுகிறது. மேகதாது அணை கட்டுவதற்காக ரூ. 9,000 கோடி செலவிடத் தயாராக இருக்கும் கர்நாடக அரசு, நதியைப் பாதுகாக்கும் இந்த ரூ. 5,000 கோடி திட்டத்திற்கு நிதி நெருக்கடியைக் காரணம் காட்டி முட்டுக்கட்டைப் போட்டு வருகிறது. நதி மாசுபடுவதால் கர்நாடகாவிற்குப் பாதிப்பில்லை என்ற சுயநலப் போக்கே இதற்கு முதன்மைக் காரணம் என்றும் அவர் சாடியுள்ளார்.