டெல்லி கல்காஜி கோவில் அருகே சிறுமிக்கு பாலியல் வன்கொடுமை: ஒருவர் கைது; 2 பேருக்கு போலீஸ் வலை!
டெல்லி கல்காஜி மந்திர் அருகே 17 வயது சிறுமி பாலியல் வன்கொடுமைக்கு ஆளானதாக கூறப்படும் சம்பவத்தில், தங்களை போலீசார் எனக் கூறி மூன்று பேர் சிறுமியையும் அவரது நண்பரையும் மிரட்டியதாக போலீசார் தெரிவித்துள்ளனர். மூவரில் ஒருவர் கைது செய்யப்பட்டுள்ள நிலையில், மேலும் இருவரை போலீசார் தேடி வருகின்றனர்.
டெல்லி:
கல்காஜி மந்திர் மற்றும் இஸ்கான் கோவில் இடையே உள்ள ஆஸ்தா குஞ்ச் பூங்காவில், 17 வயது சிறுமி பாலியல் வன்கொடுமைக்கு ஆளானதாக போலீசார் தெரிவித்துள்ளனர். இந்த சம்பவம் செப்டம்பர் 21-ஆம் தேதி இரவு நடந்ததாக கூறப்படுகிறது.
போலீசாரின் தகவலின்படி, சிறுமி தனது 17 வயது ஆண் நண்பருடன் மாலை சுமார் 7 மணியளவில் கல்காஜி கோவிலுக்கு சென்றுள்ளார். கோவிலில் வழிபாடு முடித்த பின்னர், இருவரும் சுமார் 7.30 மணியளவில் அருகிலுள்ள ஆஸ்தா குஞ்ச் பூங்காவுக்கு சென்றுள்ளனர்.
அப்போது சுமார் 25 முதல் 30 வயதுடைய மூன்று பேர் அவர்களை அணுகி, தங்களை போலீசார் எனக் கூறி மிரட்டியதாக கூறப்படுகிறது. பின்னர் சிறுமியின் நண்பரை கட்டுப்படுத்திவிட்டு, சிறுமியை மூவரும் பாலியல் வன்கொடுமை செய்ததாக போலீசார் தெரிவித்துள்ளனர்.
இது தொடர்பாக இரவு 8.45 மணியளவில் போலீஸ் கட்டுப்பாட்டு அறைக்கு தகவல் கிடைத்தது. சம்பவ இடத்துக்கு போலீசார் சென்று சிறுமியை மீட்டு மருத்துவப் பரிசோதனைக்கு அனுப்பினர்.
சிறுமியின் வாக்குமூலத்தின் அடிப்படையில் POCSO சட்டம் உள்ளிட்ட தொடர்புடைய சட்டப்பிரிவுகளின் கீழ் வழக்குப்பதிவு செய்யப்பட்டு விசாரணை தொடங்கப்பட்டது. சம்பவம் நடந்த பகுதி மற்றும் சுற்றுவட்டாரங்களில் உள்ள சிசிடிவி காட்சிகளை போலீசார் ஆய்வு செய்து குற்றம் சாட்டப்பட்டவர்களை அடையாளம் காணும் பணியில் ஈடுபட்டனர்.
சமீபத்திய நிலவரம்
செப்டம்பர் 22 காலை வெளியான தகவலின்படி, குற்றம் சாட்டப்பட்டவர்களில் ஒருவர் போலீசாருடன் ஏற்பட்ட துப்பாக்கிச் சண்டைக்குப் பின்னர் கைது செய்யப்பட்டுள்ளார். மேலும் இருவர் தொடர்ந்து தேடப்பட்டு வருவதாக டெல்லி போலீசார் தெரிவித்துள்ளனர்
Popular News
View All
0 Comments
No comments yet. Be the first to comment.