"டோரதி போன்ற படம் வந்ததற்கு பெருமைப்படுகிறேன்" - 'லப்பர் பந்து' இயக்குநர் தமிழரசன் பச்சமுத்து பாராட்டு!
இயக்குநர் கார்த்திக் சுப்பராஜ் இயக்கத்தில் அண்மையில் வெளியாகி பெரும் வரவேற்பைப் பெற்று வரும் 'டோரதி' திரைப்படத்தைக் கண்டு வியந்த 'லப்பர் பந்து' பட இயக்குநர் தமிழரசன் பச்சமுத்து, "தமிழ் சினிமாவில் இருந்து இப்படி ஒரு படம் வந்ததற்குப் பெருமைப்படுகிறேன்" எனத் தனது எக்ஸ் (ட்விட்டர்) பக்கத்தில் மனதாரப் பாராட்டியுள்ளார்.
இயக்குநர் தமிழரசன் பச்சமுத்து பாராட்டு:
தமிழ் சினிமாவில் தனக்கென ஒரு தனித்துவமான பாணியை உருவாக்கி, ரசிகர்களைத் தொடர்ந்து வியப்பில் ஆழ்த்தி வரும் முன்னணி இயக்குநர் கார்த்திக் சுப்புராஜ் . இவரது இயக்கத்தில் உருவான 10-வது மைல்கல் திரைப்படமான 'டோரதி', கடந்த செப்டம்பர் 25-ஆம் தேதி உலகம் முழுவதும் உள்ள திரையரங்குகளில் வெளியானது. சர்வதேச அளவில் டொராண்டோ திரைப்பட விழாவிலேயே (TIFF 2026) திரையிடப்பட்டுப் பாராட்டுகளை அள்ளிய இத்திரைப்படம், தற்போது தமிழக மக்களிடமும் நல்ல வரவேற்பைப் பெற்று வருகிறது.
1990-களின் பின்னணியில், தென் தமிழகத்தின் கிராமப்புறக் கலாசாரத்தோடு சாதி சார்ந்த வன்முறை, நச்சுத்தன்மை வாய்ந்த ஆணாதிக்கம் மற்றும் இரு நண்பர்களின் பிரிக்க முடியாத நட்பு ஆகியவற்றை மையமாகக் கொண்டு இக்கதை தைரியமாக உருவாக்கப்பட்டுள்ளது. இதில் கீர்த்தி சுரேஷ் 'டோரதி' என்ற முதன்மை கதாபாத்திரத்திலும், சனந்த் மற்றும் ரிஷிகாந்த் ஆகியோர் முக்கிய கதாபாத்திரங்களிலும் நடித்துள்ளனர். இசைஞானி இளையராஜாவின் 1,540-வது படமாக அமைந்துள்ள டோரதி-க்கு, திரு ஒளிப்பதிவு செய்துள்ளார்.
திரையரங்குகளில் வெளியான நாள் முதலே இத்திரைப்படம் ரசிகர்கள் மத்தியிலும், திரையுலகினர் மத்தியிலும் பெரும் விவாதங்களையும் பாராட்டுகளையும் கிளப்பியுள்ளது. இயக்குநர் மணிரத்னம், நடிகர் தனுஷ், நடிகை ஸ்ரீலீலா உள்ளிட்ட பல பிரபலங்கள் சமூக வலைத்தளங்களில் படத்தைப் பாராட்டி தங்களது கருத்துக்களைப் பதிவிட்டிருந்தனர்.
அவர் தனது பதிவில், “‘டோரதி’ போன்ற ஒரு திரைப்படம் தமிழ் சினிமாவில் இருந்து வந்ததற்கு நான் பெருமை அடைகிறேன். இந்த அற்புதமான படத்தை இயக்கிய கார்த்திக் சுப்பராஜ் இருக்கும் இதே திரைத்துறையில் நானும் ஒரு அங்கமாக இருப்பதிலும் பெருமை கொள்கிறேன். கார்த்திக் சுப்பராஜுக்கு சல்யூட்!” என்று நெகிழ்ந்து பாராட்டியுள்ளார்.
சமூகத்தில் பேசத் தயங்கும் ஆழமான கருத்துக்களைத் துணிச்சலுடன் பேசியுள்ள 'டோரதி' திரைப்படத்திற்கு இயக்குநர் தமிழரசன் பச்சமுத்து தெரிவித்துள்ள இந்த ஆதரவும் பாராட்டும், தற்போது சமூக வலைத்தளங்களில் சினிமா ரசிகர்களால் வைரலாகப் பகிரப்பட்டு வருகிறது
Popular News
View All
0 Comments
No comments yet. Be the first to comment.