வெற்றிப்பயணம் திட்டம் நாளை முதல் அமல் – முதலமைச்சர் விஜய் அறிவிப்பு!
தமிழகத்தில் மகளிருக்கான இலவச பேருந்து பயணத்தை விரிவுபடுத்தும் ‘வெற்றிப்பயணம்’ திட்டம் அக்டோபர் 2 முதல் அமலுக்கு வருகிறது. 12,692 அரசு பேருந்துகள் இத்திட்டத்தின் கீழ் கொண்டுவரப்பட உள்ள நிலையில், நாளொன்றுக்கு சுமார் 84.32 லட்சம் மகளிர் பயன்பெறுவார்கள் என தெரிவிக்கப்பட்டுள்ளது.
12,692 பேருந்துகள்
தமிழகத்தில் மகளிருக்கான இலவச பேருந்து பயணத்தை விரிவுபடுத்தும் வகையில் அறிவிக்கப்பட்டுள்ள ‘வெற்றிப்பயணம்’ திட்டம் அக்டோபர் 2-ஆம் தேதி முதல் அமலுக்கு வருகிறது. முதலமைச்சர் விஜய் தலைமையில் இதற்கான முன்னேற்பாடுகள் குறித்து ஆலோசனை நடத்தப்பட்ட நிலையில், திட்டத்தை நாளை தொடங்கி வைக்க ஏற்பாடுகள் செய்யப்பட்டுள்ளன.
தற்போது அரசு போக்குவரத்துக் கழகங்களின் நகர சாதாரணப் பேருந்துகள் மற்றும் 40 கி.மீ. வரையிலான மலைப்பகுதி சாதாரணப் பேருந்துகளில் மகளிர் கட்டணமின்றி பயணம் செய்து வருகின்றனர். புதிய திட்டத்தின் மூலம் எக்ஸ்பிரஸ், LSS, டீலக்ஸ், புறநகர் சாதாரணப் பேருந்துகள் மற்றும் 40 கி.மீ.க்கு மேற்பட்ட மலைப்பகுதி சாதாரணப் பேருந்துகள் உள்ளிட்ட கூடுதல் சேவைகளுக்கும் இந்த இலவசப் பயண வசதி விரிவுபடுத்தப்படுகிறது.
இதன்படி, 7 அரசு போக்குவரத்துக் கழகங்களின் மொத்தம் 18,413 திட்டமிடப்பட்ட பேருந்துகளில் 12,692 பேருந்துகள், அதாவது சுமார் 69 சதவீத பேருந்துகள் இத்திட்டத்தின் கீழ் இயக்கப்பட உள்ளன. மொத்தம் 1,94,649 பேருந்து நடைகளில் 1,65,312 நடைகள் இத்திட்டத்தின் கீழ் செயல்படுத்தப்பட உள்ளதாக தெரிவிக்கப்பட்டுள்ளது.
இதன் மூலம் நாளொன்றுக்கு சுமார் 84.32 லட்சம் மகளிர் பயன்பெறுவார்கள் என அரசு தரப்பில் தெரிவிக்கப்பட்டுள்ளது. மாணவிகள் தொலைதூரக் கல்லூரிகளுக்குச் செல்லவும், பெண்கள் பணியிடங்களுக்குச் செல்லவும், மருத்துவம் மற்றும் அத்தியாவசிய தேவைகளுக்காகவும் கட்டணமின்றி பேருந்துகளில் பயணிக்க முடியும் என தெரிவிக்கப்பட்டுள்ளது.
மேலும், திட்டத்தின் கீழ் இயக்கப்பட உள்ள பேருந்துகளின் மின்னணு பயணச்சீட்டு இயந்திரங்களுடனான (ETM) இணைப்புப் பணிகள் நிறைவடைந்துள்ளதாகவும், சோதனை மற்றும் சரிபார்ப்பு பணிகள் மேற்கொள்ளப்பட்டுள்ளதாகவும் தகவல் தெரிவிக்கிறது. அக்டோபர் 2 முதல் ‘வெற்றிப்பயணம்’ திட்டம் நடைமுறைக்கு வருவதால், மாநிலம் முழுவதும் மகளிருக்கான இலவச பொதுப் போக்குவரத்து வசதி மேலும் விரிவடைய உள்ளது.
Popular News
View All
0 Comments
No comments yet. Be the first to comment.