பீகாரில் மினி லாரி விபத்து: மதுபாட்டில்களை அள்ளிச்சென்ற பொதுமக்கள்!

பாட்னா:

பீகார் மாநிலத்தில் மதுபானங்களை ரகசியமாக கடத்திச் சென்ற மினி லாரி விபத்துக்குள்ளான நிலையில், லாரியில் இருந்து மதுபாட்டில்கள் வெளியே வந்ததை அறிந்த பொதுமக்கள் அவற்றை போட்டிப்போட்டு அள்ளிச் சென்ற சம்பவம் பரபரப்பை ஏற்படுத்தியுள்ளது.

கட்டுப்பாட்டை இழந்த மினி லாரி

பீகார் மாநிலம் அராரியா மாவட்டத்தில் உள்ள ராணிகஞ்ச் பகுதியில், அசாம் மாநிலப் பதிவு எண் கொண்ட மினி லாரி ஒன்று நேற்று வெள்ளிக்கிழமை சென்று கொண்டிருந்தது.

கர்காட் சுங்கச்சாவடி அருகே சென்றபோது, எதிர்பாராதவிதமாக ஓட்டுநரின் கட்டுப்பாட்டை இழந்த மினி லாரி சாலையின் தடுப்பானில் மோதி விபத்துக்குள்ளானது. மோதலின் காரணமாக லாரியின் முன்பகுதி உள்ளிட்ட பகுதிகள் பலத்த சேதமடைந்தன.

விபத்து ஏற்பட்ட உடனேயே லாரியில் இருந்த ஓட்டுநரும், கிளீனரும் வாகனத்தை அங்கேயே விட்டுவிட்டு அங்கிருந்து தப்பிச் சென்றதாக கூறப்படுகிறது.

சிமெண்ட் மூட்டைகளுக்கு அடியில் மதுபான பாட்டில்கள்

விபத்துக்குள்ளான லாரியை பொதுமக்கள் பார்த்தபோது, அதன் மேற்புறத்தில் சிமெண்ட் மூட்டைகள் அடுக்கி வைக்கப்பட்டிருந்தன. ஆனால், ஓட்டுநரும் கிளீனரும் தப்பிச் சென்றதால் சிலருக்கு சந்தேகம் ஏற்பட்டது.

இதையடுத்து லாரியை சோதனை செய்தபோது, சிமெண்ட் மூட்டைகளுக்கு அடியில் பெட்டிகளில் ஏராளமான வெளிநாட்டு மதுபான பாட்டில்கள் ரகசியமாக மறைத்து வைக்கப்பட்டிருந்தது தெரியவந்தது.

இதன் மூலம், பீகாருக்குள் மதுபானங்களை கடத்திச் செல்லும் முயற்சி நடைபெற்றிருக்கலாம் என்ற சந்தேகம் எழுந்துள்ளது.

பீகாரில் கடந்த 2016-ம் ஆண்டு முதல் முழுமையான மதுவிலக்கு சட்டம் அமலில் உள்ளது. இதனால் மாநிலத்தில் மதுபான விற்பனை, கொள்முதல் மற்றும் கடத்தல் ஆகியவை சட்டவிரோதமாக கருதப்படுகின்றன. இந்நிலையில், மதுபானங்களை ரகசியமாக கடத்திச் சென்றதாக கூறப்படும் லாரி ஒன்று விபத்துக்குள்ளானது பரபரப்பை ஏற்படுத்தியுள்ளது.

மதுபாட்டில்களை அள்ளிச்சென்ற பொதுமக்கள்

லாரியில் மதுபாட்டில்கள் இருப்பது தெரியவந்ததும், அப்பகுதியில் கூடியிருந்த பொதுமக்கள் அவற்றை எடுத்துச் செல்லத் தொடங்கினர்.

சிறுவர்கள், இளைஞர்கள், முதியவர்கள் மட்டுமின்றி பெண்களும் மதுபாட்டில்கள் மற்றும் பெட்டிகளை எடுத்துக்கொண்டு அங்கிருந்து சென்றதாக கூறப்படுகிறது. விபத்தில் சிக்கிய லாரியை மீட்பதற்கோ அல்லது போலீசாருக்கு தகவல் தெரிவிப்பதற்கோ உதவுவதற்கு பதிலாக, மதுபாட்டில்களை எடுத்துச் செல்ல பொதுமக்கள் போட்டிப்போட்டதாக தெரிவிக்கப்பட்டுள்ளது.

இந்த சம்பவத்தை அங்கிருந்த சிலர் வீடியோவாக பதிவு செய்துள்ளனர். தற்போது அந்த வீடியோக்கள் சமூக வலைதளங்களில் வெளியாகி வைரலாகி வருகின்றன.

போலீசார் விசாரணை

சம்பவம் குறித்து தகவல் கிடைத்ததும் ராணிகஞ்ச் போலீசார் சம்பவ இடத்திற்கு விரைந்து சென்றனர். அங்கு திரண்டிருந்த கூட்டத்தை போலீசார் கலைத்ததுடன், விபத்துக்குள்ளான மினி லாரியையும் அதில் மீதமிருந்த மதுபானங்களையும் பறிமுதல் செய்தனர்.

இந்த மதுபானங்கள் எங்கிருந்து கொண்டு வரப்பட்டன? யாருக்காக கொண்டு செல்லப்பட்டன? கடத்தல் பின்னணியில் யார் உள்ளனர்? லாரியின் ஓட்டுநர் மற்றும் கிளீனர் யார்? என்பது உள்ளிட்ட பல்வேறு கோணங்களில் போலீசார் விசாரணை நடத்தி வருகின்றனர்.

வீடியோ மூலம் பொதுமக்களை அடையாளம் காணும் பணி

இந்த சம்பவம் குறித்து சர்தார் எஸ்டிபிஓ கூஷில் குமார் கூறுகையில், மதுபானங்கள் பறிமுதல் செய்யப்பட்டு விசாரணை தொடங்கியுள்ளதாக தெரிவித்தார்.

மேலும், சமூக வலைதளங்களில் வெளியாகியுள்ள வீடியோக்களை ஆய்வு செய்து, லாரியில் இருந்து மதுபாட்டில்களை எடுத்துச் சென்றதாக கூறப்படும் பொதுமக்களை அடையாளம் காணும் பணியும் நடைபெற்று வருவதாக போலீசார் தெரிவித்துள்ளனர்.