பெங்களூரு விமான நிலையத்தில் ரூ.10 கோடி உயர்ரக கஞ்சா பறிமுதல் – ஒரே குடும்பத்தைச் சேர்ந்த 4 பேர் கைது!

தேவனஹள்ளி:

பெங்களூரு அருகே தேவனஹள்ளியில் அமைந்துள்ள கெம்பேகவுடா சர்வதேச விமான நிலையத்தில், வெளிநாடுகளில் இருந்து கடத்தி வரப்பட்டதாக கூறப்படும் சுமார் ரூ.10 கோடி மதிப்பிலான 30 கிலோ உயர்ரக கஞ்சா பறிமுதல் செய்யப்பட்டுள்ளது. இந்த சம்பவம் தொடர்பாக உத்தரபிரதேசத்தைச் சேர்ந்த ஒரே குடும்பத்தைச் சேர்ந்த 4 பேரை சுங்கத்துறை அதிகாரிகள் கைது செய்து விசாரணை நடத்தி வருகின்றனர்.

வெளிநாடுகளில் இருந்து விமானங்கள் மூலம் போதைப்பொருட்கள் கடத்தி வரப்படுவதாக சுங்கத்துறை அதிகாரிகளுக்கு ரகசிய தகவல் கிடைத்ததாக கூறப்படுகிறது. இதையடுத்து கெம்பேகவுடா சர்வதேச விமான நிலையத்தில் பயணிகளின் உடைமைகள் தீவிரமாக கண்காணிக்கப்பட்டன.

அப்போது மலேசியாவில் இருந்து பெங்களூரு வந்த விமானத்தில் பயணம் செய்த 2 பேரிடம் சுங்கத்துறை அதிகாரிகள் சோதனை மேற்கொண்டனர். அவர்களின் உடைமைகளை ஆய்வு செய்தபோது, மறைத்து வைக்கப்பட்டிருந்த உயர்ரக கஞ்சா இருப்பது கண்டுபிடிக்கப்பட்டது. இதனைத் தொடர்ந்து அந்த 2 பேரும் கைது செய்யப்பட்டனர்.

இதேபோல், வியட்நாமில் இருந்து வந்த மற்றொரு விமானத்தில் பயணம் செய்தவர்களிடமும் அதிகாரிகள் சோதனை நடத்தினர். அப்போது மேலும் 2 பயணிகளின் உடைமைகளில் உயர்ரக கஞ்சா மறைத்து வைக்கப்பட்டிருந்தது கண்டுபிடிக்கப்பட்டது. இதையடுத்து அவர்களும் கைது செய்யப்பட்டனர்.

கைது செய்யப்பட்டவர்கள் நமன் சர்மா, உஷா, தீபான்சு சர்மா மற்றும் பாரத் பவுத்ரி என அடையாளம் காணப்பட்டுள்ளனர். இவர்கள் அனைவரும் உத்தரபிரதேச மாநிலத்தைச் சேர்ந்தவர்கள் என்றும், ஒரே குடும்பத்தைச் சேர்ந்தவர்கள் என்றும் விசாரணையில் தெரியவந்துள்ளது.

மலேசியா மற்றும் வியட்நாமில் இருந்து தனித்தனியாக உயர்ரக கஞ்சாவை விமானம் மூலம் பெங்களூருவுக்கு கடத்தி வந்ததாக அதிகாரிகள் தெரிவித்துள்ளனர். அவர்களிடம் இருந்து மொத்தம் 30 கிலோ உயர்ரக கஞ்சா பறிமுதல் செய்யப்பட்டுள்ளதாகவும், அதன் சர்வதேச சந்தை மதிப்பு சுமார் ரூ.10 கோடி என சுங்கத்துறை அதிகாரிகள் தெரிவித்துள்ளனர்.

இந்த போதைப்பொருள் கடத்தலின் பின்னணியில் வேறு யாருக்காவது தொடர்பு உள்ளதா, வெளிநாடுகளில் இருந்து போதைப்பொருட்களை அனுப்பியது யார், பெங்களூருவில் யாரிடம் அவற்றை ஒப்படைக்க திட்டமிடப்பட்டிருந்தது என்பது உள்ளிட்ட பல்வேறு கோணங்களில் அதிகாரிகள் தொடர்ந்து விசாரணை நடத்தி வருகின்றனர்.