அமெரிக்காவில் முன்னாள் ராணுவ மேஜருக்கு மரண தண்டனை: துப்பாக்கியால் சுட்டு நிறைவேற்ற டிரம்ப் ஒப்புதல்!

வாஷிங்டன்:

அமெரிக்காவின் டெக்சாஸ் மாகாணத்தில் உள்ள போர்ட் ஹூட் ராணுவ முகாமில் கடந்த 2009-ம் ஆண்டு நடத்தப்பட்ட துப்பாக்கிச்சூடு சம்பவத்தில் 13 பேரை கொலை செய்த முன்னாள் அமெரிக்க ராணுவ மேஜர் நிடால் மாலிக் ஹசனுக்கு மரண தண்டனை நிறைவேற்ற அதிபர் டொனால்ட் டிரம்ப் ஒப்புதல் அளித்துள்ளார். ராணுவச் செயலாளர் பீட் ஹெக்செத் அளித்த பரிந்துரையின் அடிப்படையில் இந்த ஒப்புதல் வழங்கப்பட்டுள்ளது.

2009-ம் ஆண்டு நவம்பர் மாதம் போர்ட் ஹூட் ராணுவ தளத்தில் உள்ள மருத்துவ மையத்தில் நிடால் ஹசன் துப்பாக்கியால் சுட்டதில் 13 பேர் உயிரிழந்தனர். மேலும் 30-க்கும் மேற்பட்டோர் காயமடைந்தனர். அப்போது ராணுவ மனநல மருத்துவராக பணியாற்றிய ஹசன், ஆப்கானிஸ்தானுக்கு அனுப்பப்படுவதற்கான மருத்துவ பரிசோதனைகளில் ஈடுபட்டிருந்த ராணுவ வீரர்கள் மீது துப்பாக்கிச்சூடு நடத்தியதாக வழக்கு தொடரப்பட்டது.

இந்த வழக்கில் ராணுவ நீதிமன்றத்தில் விசாரணை நடைபெற்ற நிலையில், 2013-ம் ஆண்டு நிடால் ஹசனுக்கு மரண தண்டனை விதிக்கப்பட்டது. அவருக்கு எதிராக முன்கூட்டியே திட்டமிட்டு கொலை செய்தது உள்ளிட்ட பல்வேறு குற்றச்சாட்டுகள் நிரூபிக்கப்பட்டன. தற்போது அவர் கன்சாஸ் மாகாணத்தில் உள்ள ஃபோர்ட் லீவன்வொர்த் ராணுவ சிறையில் மரண தண்டனை கைதியாக உள்ளார். 

துப்பாக்கியால் சுட்டு மரண தண்டனை

நிடால் ஹசனுக்கு மரண தண்டனையை துப்பாக்கியால் சுட்டு (firing squad) நிறைவேற்றுவதற்கு டிரம்ப் ஒப்புதல் அளித்துள்ளார். அமெரிக்க ராணுவத்தில் மரண தண்டனை நிறைவேற்றப்படுவது மிகவும் அரிதானதாகும்.

இந்த தண்டனை நடைமுறைக்கு வந்தால், 1961-ம் ஆண்டுக்குப் பிறகு அமெரிக்க ராணுவத்தில் நிறைவேற்றப்படும் முதல் மரண தண்டனையாக இது அமையும். மேலும், அமெரிக்க ராணுவத்தில் துப்பாக்கிச் சூடு மூலம் மரண தண்டனை நிறைவேற்றப்பட்டு பல ஆண்டுகள் கடந்துள்ள நிலையில், இந்த நடவடிக்கை குறிப்பிடத்தக்கதாக பார்க்கப்படுகிறது.

டிரம்பின் ஒப்புதலுக்குப் பிறகு மரண தண்டனையை நிறைவேற்றுவதற்கான தேதி மற்றும் இடத்தை அமெரிக்க ராணுவச் செயலாளர் தீர்மானிக்க உள்ளார். இருப்பினும், சட்டரீதியான மேல்முறையீடுகள் மூலம் தண்டனை நிறைவேற்றப்படுவது தாமதமாக வாய்ப்புள்ளதாகவும் தெரிவிக்கப்பட்டுள்ளது.

அமெரிக்க ராணுவ சட்ட நடைமுறைகளின்படி, ராணுவ நீதிமன்றம் விதித்த மரண தண்டனையை அதிபர் அங்கீகரித்த பிறகே அதை நிறைவேற்ற முடியும். ஹசன் தொடர்பான வழக்கிலும் அதிபரின் ஒப்புதல் தற்போது கிடைத்துள்ளதால், அடுத்தகட்ட நடைமுறைகள் தொடங்க உள்ளன.