சென்னை: போராட்டத்தில் ஈடுபட்ட மருத்துவப் பணியாளர்கள் குண்டுக்கட்டாக கைது – 200-க்கும் மேற்பட்டோர் பங்கேற்பு!

சென்னை:

பணி நிரந்தரம் உள்ளிட்ட பல்வேறு கோரிக்கைகளை வலியுறுத்தி சென்னையில் உண்ணாவிரதப் போராட்டத்தில் ஈடுபட முயன்ற அரசு பல்நோக்கு மருத்துவமனைப் பணியாளர்களை போலீசார் தடுத்து நிறுத்தினர். அனுமதி மறுக்கப்பட்ட நிலையில், சென்னை ராஜரத்தினம் மைதானம் அருகே சாலை மறியலில் ஈடுபட்ட மருத்துவப் பணியாளர்களை போலீசார் குண்டுக்கட்டாகத் தூக்கிச் சென்று கைது செய்தனர். இந்தப் போராட்டத்தில் 200-க்கும் மேற்பட்டோர் கலந்து கொண்டனர்.

2,500-க்கும் மேற்பட்ட மருத்துவப் பணியாளர்கள்

தமிழகத்தில் உள்ள அரசு பல்நோக்கு மருத்துவமனைகளில் சுமார் 2,500-க்கும் மேற்பட்ட பணியாளர்கள் தினக்கூலி அடிப்படையில் பணிபுரிந்து வருகின்றனர். கடந்த 2013 மற்றும் 2014-ம் ஆண்டுகளில் தற்காலிகப் பணி நியமனத்தின் அடிப்படையில், இடஒதுக்கீட்டு முறையைப் பின்பற்றி மாநிலத்தின் ஒவ்வொரு மாவட்டத்திலும் உள்ள இணை இயக்குநர்கள் மூலம் இவர்கள் நியமிக்கப்பட்டனர்.

பணி நியமன ஆணையில், ஐந்தாண்டு காலப் பணியை நிறைவு செய்த பிறகு பணி நிரந்தரம் செய்யப்படுவார்கள் எனக் குறிப்பிடப்பட்டிருந்ததாகக் கூறப்படுகிறது. ஆனால், பல ஆண்டுகள் கடந்தும் தங்களுக்கு இதுவரை பணி நிரந்தரம் வழங்கப்படவில்லை என மருத்துவப் பணியாளர்கள் வேதனை தெரிவிக்கின்றனர்.

தற்போதும் தினக்கூலி அடிப்படையிலேயே பணிபுரிந்து வருவதால், தங்களைப் பணி நிரந்தரம் செய்ய வேண்டும் என்று அவர்கள் தொடர்ந்து அரசிடம் கோரிக்கை விடுத்து வருகின்றனர்.

பணி நிரந்தரம் உள்ளிட்ட கோரிக்கைகள்

மருத்துவப் பணியாளர்கள் தங்களது நீண்டகாலக் கோரிக்கைகளை வலியுறுத்தி போராட்டத்தில் ஈடுபட முடிவு செய்தனர். அதன்படி, பணி நிரந்தரம், மாதத்திற்கு ஒரு நாள் விடுமுறை உள்ளிட்ட பல்வேறு கோரிக்கைகளை முன்வைத்து சென்னையில் உண்ணாவிரதப் போராட்டம் நடத்தத் திட்டமிட்டனர்.

இதற்காக சென்னை எழும்பூரில் உள்ள ராஜரத்தினம் மைதானத்தில் போராட்டம் நடத்துவதாக அறிவித்திருந்தனர். பல ஆண்டுகளாகத் தற்காலிகப் பணியாளர்களாகவே தொடர்வதால், தங்களது வாழ்வாதாரப் பாதுகாப்பையும் பணிநிலைத்தன்மையையும் உறுதி செய்ய அரசு நடவடிக்கை எடுக்க வேண்டும் என்பதே அவர்களின் முக்கியக் கோரிக்கையாக இருந்தது.

வீடுகளுக்குச் சென்று தடுத்து நிறுத்திய போலீசார்

மருத்துவப் பணியாளர்களின் போராட்டத்தைத் தடுக்கும் வகையில், போராட்டத்தின் நிர்வாகிகள் மற்றும் பணியாளர்களின் வீடுகளுக்கே சென்ற போலீசார் அவர்களை வீட்டுக் காவலில் வைத்ததாகக் கூறப்படுகிறது.

சென்னையில் மட்டுமின்றி தமிழகத்தின் பல்வேறு பகுதிகளிலும் போராட்டத்தில் பங்கேற்கத் திட்டமிட்டிருந்த மருத்துவப் பணியாளர்கள் தடுத்து நிறுத்தப்பட்டு வீட்டுக் காவலில் வைக்கப்பட்டதாகத் தகவல் தெரிவிக்கிறது.

மேலும், உண்ணாவிரதப் போராட்டத்திற்கும் போலீசார் அனுமதி மறுத்தனர். இதனால் திட்டமிட்டபடி போராட்டத்தை நடத்துவதில் மருத்துவப் பணியாளர்களுக்குச் சிக்கல் ஏற்பட்டது.

ராஜரத்தினம் மைதானம் அருகே சாலை மறியல்

போராட்டத்திற்கு அனுமதி மறுக்கப்பட்ட நிலையிலும், மருத்துவப் பணியாளர்கள் சென்னை ராஜரத்தினம் மைதானம் அருகே திரண்டு சாலையில் அமர்ந்து தங்களது கோரிக்கைகளை வலியுறுத்திப் போராட்டத்தில் ஈடுபட்டனர். தொடர்ந்து சாலை மறியலிலும் ஈடுபட்டதால் அப்பகுதியில் பரபரப்பு ஏற்பட்டது.

அப்போது பாதுகாப்புப் பணியில் ஈடுபட்டிருந்த போலீசார், போராட்டத்தில் ஈடுபட்ட மருத்துவப் பணியாளர்களைக் குண்டுக்கட்டாகத் தூக்கிச் சென்று கைது செய்தனர். பின்னர் அவர்களை அரசு வாகனங்களில் ஏற்றி, அருகிலுள்ள சமுதாய நலக்கூடத்தில் தங்க வைத்தனர்.

இந்தப் போராட்டத்தில் 200-க்கும் மேற்பட்ட மருத்துவப் பணியாளர்கள் கலந்து கொண்டதாகத் தெரிவிக்கப்பட்டுள்ளது.