தமிழகத்தின் புதிய முழுநேர ஆளுநராக ஆர்லேகர் சென்னை லோக்பவனில் இன்று பொறுப்பேற்றுக் கொண்டார். முதலமைச்சர் ஜோசப் விஜய் இன்று மாலை அவரைச் சந்திக்க உள்ளார்.
சென்னை: தமிழ்நாட்டின் முழுநேர ஆளுநராக ராஜேந்திர விஸ்வநாத் ஆர்லேகர் இன்று சென்னை லோக்பவனில் பொறுப்பேற்றுக் கொண்டார்.
தமிழ்நாடு உட்பட 6 மாநிலங்களுக்குப் புதிய ஆளுநர்களை நியமித்து, குடியரசுத் தலைவர் திரௌபதி முர்மு இரண்டு நாட்களுக்கு முன் உத்தரவு பிறப்பித்தார். அதன்படி, கேரள ஆளுநராக இருந்த ஆர்லேகர் தமிழ்நாட்டின் முழுநேர ஆளுநராக நியமிக்கப்பட்டார்.
சென்னை லோக்பவனில் நடந்த பதவியேற்பு நிகழ்ச்சியில், ஆளுநரின் செயலாளர் சஜ்ஜன் சிங் ஆர். சவான் ஐ.ஏ.எஸ். மற்றும் லோக்பவன் அதிகாரிகள் கலந்துகொண்டனர்.
முதலமைச்சர் ஜோசப் விஜய் இன்று மாலை புதிய ஆளுநரைச் சந்திக்கவுள்ளார்.
தமிழ்நாட்டின் ஆளுநராக இருந்த ஆர்.என்.ரவி, கடந்த மார்ச் 5-ஆம் தேதி மேற்கு வங்க ஆளுநராக மாற்றப்பட்டார். அவருக்குப் பதிலாகப் புதிய ஆளுநர் உடனே நியமிக்கப்படவில்லை. கேரள ஆளுநர் ஆர்.வி.ஆர்லேகர் தமிழ்நாட்டின் பொறுப்பு ஆளுநராக நியமிக்கப்பட்டார். முதலமைச்சர் விஜய்க்குப் பதவிப்பிரமாணம் செய்து வைத்ததும் இவரே.
இதனால் 6 மாதங்களுக்கும் மேலாகத் தமிழ்நாட்டுக்கு முழுநேர ஆளுநர் இல்லாத நிலை நீடித்தது. இடையில், கடந்த ஆகஸ்டில் ஆந்திர முன்னாள் முதலமைச்சர் கிரண் குமார் ரெட்டி தமிழக ஆளுநராக நியமிக்கப்படலாம் என்று பேசப்பட்டது. அப்போது பிரதமர் வெளிநாட்டுப் பயணத்தில் இருந்ததால், அவர் திரும்பிய பிறகு அறிவிப்பு வரலாம் எனக் கூறப்பட்டது. ஆனால் அப்படி எந்த அறிவிப்பும் வெளியாகவில்லை.
இப்போது ஆர்லேகரே முழுநேர ஆளுநராக நியமிக்கப்பட்டதன் மூலம், இந்தக் காத்திருப்புக்கு முடிவு கிடைத்துள்ளது.
Popular News
View All
0 Comments
No comments yet. Be the first to comment.