‘ராமாயணா’ படத்தின் ஓடிடி உரிமையை கைப்பற்றிய பிரபல நிறுவனம் – ரூ.450 கோடி ஒப்பந்தம் எனத் தகவல்!

ராமாயணா’ திரைப்படத்தின் முதல் பாகம் 2026 நவம்பர் 5-ம் தேதி தீபாவளியை முன்னிட்டு உலகம் முழுவதும் திரையரங்குகளில் வெளியாகவுள்ள நிலையில், இப்படத்தின் டிஜிட்டல் வெளியீடு தொடர்பான முக்கிய அறிவிப்பு வெளியாகியுள்ளது. ஜியோஹாட்ஸ்டார் (JioHotstar) தளத்தில் இப்படம் திரையரங்கு வெளியீட்டுக்குப் பிறகு பார்வையாளர்களுக்குக் கிடைக்கவுள்ளது. மேலும், இப்படத்தின் டிஜிட்டல் மற்றும் செயற்கைக்கோள் ஒளிபரப்பு உரிமைகள் ரூ.450 கோடிக்கு விற்பனையாகியுள்ளதாகத் தகவல்கள் தெரிவிக்கின்றன.

பிரம்மாண்டமாக உருவாகும் ‘ராமாயணா’

வால்மீகி எழுதிய ராமாயணக் காவியத்தை அடிப்படையாகக் கொண்டு, இயக்குநர் நிதேஷ் திவாரி இயக்கத்தில் பிரம்மாண்டமான பொருட்செலவில் உருவாகியுள்ள திரைப்படம் ‘ராமாயணா’. இந்தியாவின் புகழ்பெற்ற இதிகாசத்தை நவீனத் திரைப்படத் தொழில்நுட்பத்தின் உதவியுடன் திரையில் கொண்டு வரும் முயற்சியாக இப்படம் உருவாக்கப்பட்டுள்ளது.

இப்படத்தில் ரன்பீர் கபூர் ராமராகவும், சாய் பல்லவி சீதையாகவும், யாஷ் ராவணனாகவும் நடிக்கின்றனர். மேலும், சன்னி தியோல் அனுமனாகவும், ரவி துபே லட்சுமணனாகவும் நடிக்கின்றனர். அருண் கோவில், லாரா தத்தா, ரகுல் பிரீத் சிங், விவேக் ஓபராய், குணால் கபூர், காஜல் அகர்வால் உள்ளிட்ட பலரும் முக்கிய கதாபாத்திரங்களில் இடம்பெற்றுள்ளனர்.

இப்படத்தின் திரைக்கதையை ஸ்ரீதர் ராகவன் உருவாக்கியுள்ளார். பிரைம் ஃபோகஸ் ஸ்டுடியோஸ், டிஎன்இஜி (DNEG) மற்றும் மான்ஸ்டர் மைண்ட் கிரியேஷன்ஸ் ஆகிய நிறுவனங்கள் இணைந்து இப்படத்தைத் தயாரித்துள்ளன.

ஜியோஹாட்ஸ்டாரில் வெளியாகும் ‘ராமாயணா’

‘ராமாயணா’ திரைப்படத்தின் முதல் பாகத்தைத் திரையரங்குகளில் பார்த்த பிறகு, வீட்டிலிருந்தே டிஜிட்டல் முறையில் காணும் வசதியையும் படக்குழு ஏற்படுத்தியுள்ளது. இதற்காக தயாரிப்பு நிறுவனமான பிரைம் ஃபோகஸ் ஸ்டுடியோஸ் மற்றும் ஜியோஹாட்ஸ்டார் இடையே டிஜிட்டல் வெளியீட்டுக்கான கூட்டாண்மை அறிவிக்கப்பட்டுள்ளது.

இந்த ஒப்பந்தத்தின்படி, படத்தின் திரையரங்கு வெளியீட்டுக் காலம் முடிந்த பிறகு ஜியோஹாட்ஸ்டார் தளத்தில் படம் கிடைக்கும். வழக்கமான சந்தா முறையில் மட்டும் அல்லாமல், தனியாகக் கட்டணம் செலுத்திப் படத்தைப் பார்க்கும் ‘பே-பெர்-வியூ’ (Pay-per-view) முறையில் வெளியிடத் திட்டமிடப்பட்டுள்ளது. அதாவது, ஏற்கெனவே ஜியோஹாட்ஸ்டார் சந்தாதாரராக இருப்பவர்கள்கூட இப்படத்தைப் பார்ப்பதற்குத் தனியாகக் கட்டணம் செலுத்த வேண்டியிருக்கலாம்.

எனினும், ஓடிடியில் வெளியாகும் சரியான தேதி மற்றும் பார்வைக்கான கட்டணம் குறித்த விவரங்கள் இன்னும் அறிவிக்கப்படவில்லை.

ரூ.450 கோடி உரிமை ஒப்பந்தம்

‘ராமாயணா’ திரைப்படத்தின் டிஜிட்டல் மற்றும் செயற்கைக்கோள் ஒளிபரப்பு உரிமைகள் ரூ.450 கோடிக்கு ஒப்பந்தம் செய்யப்பட்டுள்ளதாகத் திரைத்துறை சார்ந்த செய்திகள் தெரிவிக்கின்றன. இந்தத் தொகை குறித்த தகவல் அதிகாரப்பூர்வமாக முழுமையாக உறுதிப்படுத்தப்படாத நிலையில், இது இந்தியத் திரைப்படத் துறையில் பேசப்படும் மிகப்பெரிய உரிமை ஒப்பந்தங்களில் ஒன்றாகக் கவனம் பெற்றுள்ளது.

படத்தின் பிரம்மாண்டமான தயாரிப்பு, முன்னணி நட்சத்திரங்களின் பங்கேற்பு, உலகளாவிய வெளியீட்டுத் திட்டம் மற்றும் ராமாயணக் காவியத்துக்கு உள்ள ரசிகர் ஆதரவு ஆகியவை இந்த எதிர்பார்ப்புக்குக் காரணமாகக் கூறப்படுகின்றன.

சோனி பிக்சர்ஸ் வெளியீடு

சோனி பிக்சர்ஸ் இந்தப் படத்தின் முதல் பாகத்தை உலகம் முழுவதும் வரும் நவம்பர் 5 ஆம் தேதி பல மொழிகளில் சாவதேச அளவில் வெளியிட இருக்கிறது.

ஓடிடி உரிமையை கைப்பற்றிய ஜியோ ஹாட்ஸ்டார்

இந்த நிலையில், ‘ராமாயணா’ படத்தின் திரையரங்க வெளியீட்டுக்குப் பிறகு, ஜியோ ஹாட்ஸ்டார் ஓடிடி தளத்தில் வெளியாகும் என்று அறிவிப்பு வெளியாகியுள்ளது.

ஏ.ஆர். ரஹ்மான் – ஹான்ஸ் ஜிம்மர் இசைக் கூட்டணி

‘ராமாயணா’ படத்தின் மற்றொரு முக்கியச் சிறப்பம்சம், ஆஸ்கர் விருது பெற்ற இசையமைப்பாளர்களான "ஏ.ஆர். ரஹ்மான் மற்றும் ஹான்ஸ் ஜிம்மர்" இணைந்து இசையமைத்திருப்பதாகும்.

இந்திய இசையின் உணர்வுகளையும் ஹாலிவுட் திரைப்பட இசையின் பிரம்மாண்டமான ஒலியமைப்பையும் ஒருங்கிணைக்கும் முயற்சியாக இந்தக் கூட்டணி பார்க்கப்படுகிறது. இதனால் படத்தின் பின்னணி இசை மற்றும் பாடல்கள் குறித்த எதிர்பார்ப்பும் ரசிகர்கள் மத்தியில் அதிகரித்துள்ளது.

இரண்டு பாகங்களாக வெளியாகும் திரைப்படம்

‘ராமாயணா’ திரைப்படம் இரண்டு பாகங்களாக உருவாக்கப்பட்டுள்ளது. முதல் பாகம் 2026 நவம்பர் 5-ம் தேதி தீபாவளியை முன்னிட்டு இந்தி, தமிழ், தெலுங்கு, கன்னடம், மலையாளம் மற்றும் ஆங்கிலம் உள்ளிட்ட மொழிகளில் உலகம் முழுவதும் திரையரங்குகளில் வெளியாகவுள்ளது.

இரண்டாம் பாகம் 2027 தீபாவளியை முன்னிட்டு வெளியாகத் திட்டமிடப்பட்டுள்ளது. இந்திய இதிகாசத்தைப் பிரம்மாண்டமான திரை அனுபவமாக வழங்கும் இந்தப் படத்தின் வெளியீட்டுக்காக ரசிகர்கள் ஆவலுடன் காத்திருக்கின்றனர்.

திரையரங்கு வெளியீட்டுக்குப் பிறகு ஜியோஹாட்ஸ்டார் தளத்தில் தனிக் கட்டண முறையில் படம் வெளியாகும் என்ற அறிவிப்பு, இப்படத்தின் டிஜிட்டல் வெளியீட்டுக்கும் புதிய எதிர்பார்ப்பை ஏற்படுத்தியுள்ளது.