நேபாளத்தில் கடும் பனிப்பொழிவில் சிக்கிய 6 இந்திய சுற்றுலாப் பயணிகள் பத்திரமாக மீட்பு!
நேபாளத்தில் கடும் பனிப்பொழிவில் சிக்கிய 6 இந்திய சுற்றுலாப் பயணிகள் தனியார் ஹெலிகாப்டர் மூலம் பத்திரமாக மீட்கப்பட்டனர். அவர்கள் மருத்துவமனையில் சிகிச்சை பெற்று வருகின்றனர்.
நேபாளத்தில் கடும் பனிப்பொழிவால் சிக்கித் தவித்த 6 இந்திய சுற்றுலாப் பயணிகள் ஹெலிகாப்டர் மூலம் பத்திரமாக மீட்கப்பட்டனர். அவர்கள் தற்போது மருத்துவமனையில் சிகிச்சை பெற்று வருகின்றனர். அவர்களின் உடல்நிலை ஆபத்தான நிலையில் இல்லை என அதிகாரிகள் தெரிவித்துள்ளனர்.
நேபாளத்தின் டோல்பா மாவட்டத்தில் அமைந்துள்ள ஷே-போக்சுண்டோ தேசிய பூங்கா பகுதிக்கு இந்தியாவைச் சேர்ந்த 4 ஆண்கள், 2 பெண்கள் என மொத்தம் 6 பேர் சுற்றுலா சென்றிருந்தனர். அங்கு நிலவிய கடும் பனிப்பொழிவால் அவர்கள் திரும்ப முடியாமல் தவித்தனர். நவம்பர் 1-ஆம் தேதி முதல் அவர்களுடனான தொடர்பும் துண்டிக்கப்பட்டது.
இதையடுத்து, சுற்றுலாப் பயணிகளை மீட்க நேபாள அதிகாரிகள் நடவடிக்கை மேற்கொண்டனர். ஞாயிற்றுக்கிழமை மீட்புப் பணிக்குச் சென்ற ராணுவ ஹெலிகாப்டரால் மோசமான வானிலை காரணமாகத் தரையிறங்க முடியவில்லை.
தொடர்ந்து, திங்கள்கிழமை காலை தனியார் ஹெலிகாப்டர் மூலம் 6 பேரும் பத்திரமாக மீட்கப்பட்டனர். அவர்கள் டோல்பா மாவட்டத்தில் உள்ள அரசு மருத்துவமனையில் அனுமதிக்கப்பட்டுள்ளனர்.
கடும் பனிப்பொழிவு நிலவியதால் அந்தப் பகுதிக்குச் செல்ல வேண்டாம் என உள்ளூர் அதிகாரிகள் எச்சரித்திருந்த நிலையில், சுற்றுலாப் பயணிகள் அங்கு சென்றதாகவும் தெரிவிக்கப்பட்டுள்ளது. மலைப்பகுதிகளில் நிலவும் மோசமான வானிலையைக் கருத்தில் கொண்டு சுற்றுலாப் பயணிகள் எச்சரிக்கையுடன் இருக்க வேண்டும் என அதிகாரிகள் அறிவுறுத்தியுள்ளனர்.
0 Comments
No comments yet. Be the first to comment.