பட்டினப்பாக்கத்தில் புதிய தலைமைச் செயலகம்: பழைய குடியிருப்புகளை இடிக்க டெண்டர்!
பட்டினப்பாக்கத்தில் புதிய தலைமைச் செயலகம் அமைக்க எதிர்ப்பு கிளம்பியதால் திட்டம் கைவிடப்படும் என எதிர்பார்க்கப்பட்ட நிலையில், தற்போது அங்குள்ள பழைய குடியிருப்புகளை அகற்றுவதற்கான டெண்டர் கோரப்பட்டுள்ளது.
சென்னை பட்டினப்பாக்கத்தில் புதிய தலைமைச் செயலகம் கட்டுவதற்கு திட்டமிடப்பட்டுள்ள இடத்தில் உள்ள 96 பழைய குடியிருப்புகளை அகற்றுவதற்கான டெண்டர் தற்போது கோரப்பட்டுள்ளது. தமிழ்நாடு வீட்டு வசதி வாரியத்திற்குச் சொந்தமான இந்த பழமையான குடியிருப்புகளை இடித்து அகற்றுவதற்கான நடவடிக்கைகளை அரசு தொடங்கியுள்ளது.
முன்னதாக, 20 லட்சம் சதுரடி பரப்பளவில் சுமார் 1,200 கோடி ரூபாய் மதிப்பீட்டில் புதிய தலைமைச் செயலகம் மற்றும் சட்டசபை கட்டப்படும் என்று அரசாணை வெளியிடப்பட்டது. சென்னை கோட்டை வளாகத்தில் நிலவும் இடநெருக்கடியைத் தவிர்க்கும் வகையில் இந்த புதிய திட்டம் முன்னெடுக்கப்பட்டது.
இருப்பினும், பட்டினப்பாக்கத்தில் இத்திட்டம் அமைவதற்கு அப்பகுதியைச் சேர்ந்த முள்ளிக்குப்பம், முள்ளிமா நகர் மற்றும் மயிலை உள்ளிட்ட பகுதி மீனவ அமைப்புகள் கடும் எதிர்ப்புத் தெரிவித்துப் போராட்டத்தில் ஈடுபட்டனர். இதனால், பட்டினப்பாக்கம் புதிய தலைமைச் செயலகத் திட்டம் கைவிடப்பட்டு, பல்லவன் இல்லம் போன்ற மாற்று இடங்களில் செயலகம் அமையலாம் எனத் தகவல்கள் வெளியாகின.
ஆனால், புதிய தலைமைச் செயலகம் கட்டுவதற்கான அரசாணை இதுவரை அதிகாரப்பூர்வமாக ரத்து செய்யப்படவில்லை. அறிவிப்பு முழுமையாகத் திரும்பப் பெறப்படாத நிலையில், தற்போது திட்டமிடப்பட்ட இடத்தில் உள்ள பழைய குடியிருப்புகளை இடிக்கும் பணி முடுக்கிவிடப்பட்டுள்ளது.
0 Comments
No comments yet. Be the first to comment.