செவ்வாய் கிரகத்தைப் போன்ற செயற்கை வாழ்விடம்: 378 நாட்கள் தனிமையில் இருந்த 4 பேர்!

அமெரிக்க விண்வெளி ஆய்வு நிறுவனமான நாசா நடத்திய செவ்வாய் கிரகச் சூழல் சோதனையில் பங்கேற்ற 4 பேர், 378 நாட்களுக்குப் பிறகு பாதுகாப்பாக வெளியே வந்தனர்.

செவ்வாய் கிரகத்தில் மனிதர்களை அனுப்பத் திட்டம்

செவ்வாய் கிரகத்திற்கு மனிதர்களை அனுப்பும் முயற்சியில் அமெரிக்க விண்வெளி ஆய்வு நிறுவனமான நாசா தீவிரமாக ஈடுபட்டு வருகிறது. பூமியிலிருந்து பல கோடி கிலோமீட்டர் தொலைவில் உள்ள செவ்வாய் கிரகத்தில் மனிதர்கள் நீண்ட காலம் தங்குவதற்கான சாத்தியக்கூறுகளை ஆராய பல்வேறு சோதனைகள் மேற்கொள்ளப்பட்டு வருகின்றன.

செவ்வாய் கிரகத்திற்குப் பயணம் மேற்கொள்ளும்போது விண்வெளி வீரர்கள் எதிர்கொள்ளும் உடல் மற்றும் மனநலச் சவால்களை முன்கூட்டியே அறிந்துகொள்வது அவசியம். இதற்காக, பூமியிலேயே செவ்வாய் கிரகத்தைப் போன்ற செயற்கை வாழ்விடத்தை உருவாக்கி நாசா ஆய்வு நடத்தியது.

378 நாட்கள் செயற்கை வாழ்விடத்தில் தங்கிய 4 பேர்

அமெரிக்காவின் டெக்சாஸ் மாகாணத்தில் உள்ள ஹூஸ்டன் நகரின் ஜான்சன் விண்வெளி மையத்தில், முப்பரிமாண அச்சிடும் தொழில்நுட்பத்தின் மூலம் சுமார் 1,700 சதுர அடி பரப்பளவில் இந்தச் செயற்கை வாழ்விடம் உருவாக்கப்பட்டது.இந்தச் சோதனையின் இரண்டாம் கட்டத்தில், ராஸ் எல்டர், எல்லென் எல்லிஸ், மேத்யூ மாண்ட்கோமரி, ஜேம்ஸ் ஸ்பைசர் ஆகிய 4 பேர் பங்கேற்றனர். கடந்த 2025-ம் ஆண்டு அக்டோபர் 19-ம் தேதி அந்த வாழ்விடத்திற்குள் சென்ற அவர்கள், வெளி உலகத்துடனான தொடர்புகள் கட்டுப்படுத்தப்பட்ட சூழலில் தங்கியிருந்தனர்.

கடுமையான கட்டுப்பாடுகளுடன் பயிற்சி

இந்த 378 நாட்களிலும் செவ்வாய் கிரகத்தில் மனிதர்கள் வாழும்போது எதிர்கொள்ளக்கூடிய சவால்களைப் போன்ற சூழல்கள் உருவாக்கப்பட்டன.

செவ்வாய் கிரகத்தின் மண்ணைப் போன்ற அமைப்பில் பயிர்களை வளர்ப்பது, குறைந்த அளவிலான உணவு மற்றும் தண்ணீரைப் பயன்படுத்துவது, வாழ்விடத்தைப் பராமரிப்பது உள்ளிட்ட பணிகளில் அவர்கள் ஈடுபட்டனர்.

மேலும், பூமிக்கும் செவ்வாய் கிரகத்திற்கும் இடையிலான தொலைவால் ஏற்படக்கூடிய தகவல் தொடர்புத் தாமதங்களையும் இந்தச் சோதனையில் உருவகப்படுத்தினர். இதன் மூலம், உடனடியாகத் தகவல்களைப் பரிமாறிக்கொள்ள முடியாத சூழலில் விண்வெளி வீரர்கள் எவ்வாறு செயல்படுவார்கள் என்பதையும் ஆய்வு செய்தனர்.

வெற்றிகரமாக நிறைவடைந்த சோதனை

378 நாட்கள் செயற்கை வாழ்விடத்தில் தங்கியிருந்த 4 பேரும், தங்களுக்கான சோதனைகளை நிறைவு செய்து 2026 நவம்பர் 1-ம் தேதி பாதுகாப்பாக வெளியே வந்தனர். அவர்களை நாசா அதிகாரிகள் வரவேற்றனர்.இந்தச் சோதனை நிறைவடைந்ததைத் தொடர்ந்து, விண்வெளி வீரர்களின் உடல்நிலை, மனநிலை மற்றும் செயல்திறன் குறித்து சுமார் இரண்டு வாரங்கள் மதிப்பீடுகளும் ஆய்வுகளும் மேற்கொள்ளப்பட உள்ளன.

செவ்வாய் கிரகப் பயணத்திற்கு உதவும் ஆய்வு

நாசா நடத்திய இந்த CHAPEA திட்டத்தின் முதல் கட்டத்தில், 4 பேர் 2023 முதல் 2024 வரையிலான காலகட்டத்தில் இதேபோல் 378 நாட்கள் செயற்கை வாழ்விடத்தில் தங்கியிருந்தனர்.

தற்போது இரண்டாவது கட்டமும் நிறைவடைந்துள்ள நிலையில், நீண்ட கால விண்வெளிப் பயணங்களின்போது வீரர்களின் உடல்நலம், மனநலம், குழுவாகச் செயல்படும் திறன் மற்றும் குறைந்த வளங்களை நிர்வகிக்கும் திறன் ஆகியவற்றைப் புரிந்துகொள்ள இந்த ஆய்வு உதவும் என எதிர்பார்க்கப்படுகிறது.

முதலில் நிலவுக்கு மனிதர்களை மீண்டும் அனுப்பும் திட்டங்களையும், எதிர்காலத்தில் செவ்வாய் கிரகத்திற்கு மனிதர்களை அனுப்புவதற்கான முயற்சிகளையும் முன்னெடுத்து வரும் நாசாவுக்கு இந்த ஆய்வின் முடிவுகள் முக்கியத்துவம் வாய்ந்தவையாக இருக்கும்.