3 வயது சிறுமியின் மார்பில் குத்திய கத்தரிக்கோல்... அறுவை சிகிச்சை மூலம் அகற்றி உயிரைக் காப்பாற்றிய அகமதாபாத் மருத்துவர்கள்!

அகமதாபாத்:

குஜராத் மாநிலம் கட்ச் பகுதியைச் சேர்ந்த தொழிலாளி தம்பதியின் 3 வயது மகள், கடந்த அக்டோபர் 29-ஆம் தேதி தனது 5 வயது அண்ணனுடன் வீட்டில் விளையாடிக் கொண்டிருந்தார். அப்போது எதிர்பாராத விதமாக கத்தரிக்கோல் சிறுமியின் மார்புப் பகுதியில் குத்தியது. இதில் படுகாயமடைந்த சிறுமி உயிருக்கு ஆபத்தான நிலையில் இருந்தார்.

அடுத்தடுத்து மருத்துவமனைகளுக்கு மாற்றம்

இதையடுத்து சிறுமியை உடனடியாக அப்பகுதியில் உள்ள தனியார் மருத்துவமனைக்குக் கொண்டு சென்றனர். பின்னர் காந்திதாம் பகுதியில் உள்ள மற்றொரு தனியார் மருத்துவமனைக்கு மாற்றப்பட்டு, அங்கு சிடி ஸ்கேன் பரிசோதனை மேற்கொள்ளப்பட்டது.

சிறுமியின் நிலைமை மிகவும் கவலைக்கிடமாக இருந்ததால், மேல் சிகிச்சைக்காக அகமதாபாத் சிவில் மருத்துவமனைக்கு மருத்துவர்கள் பரிந்துரைத்தனர். அன்று இரவு சுமார் 10 மணியளவில் சிறுமி மருத்துவமனையில் அனுமதிக்கப்பட்டார்.

சிக்கலான அறுவை சிகிச்சை

இதையடுத்து குழந்தைகள் அறுவை சிகிச்சைப் பிரிவுத் தலைவர் டாக்டர் ராகேஷ் ஜோஷி மேற்பார்வையில், உதவிப் பேராசிரியர்கள் டாக்டர் காஷ்வி மற்றும் டாக்டர் மிருணாளினி தலைமையிலான மருத்துவக் குழுவினர் அறுவை சிகிச்சையை மேற்கொண்டனர்.

மயக்கவியல் நிபுணர்கள் மற்றும் மருத்துவக் குழுவினரின் உதவியுடன் மிகவும் கவனமாகச் செயல்பட்டு, சிறுமியின் மார்பில் குத்தியிருந்த கத்தரிக்கோலை வெற்றிகரமாக அகற்றினர். தற்போது சிறுமியின் உடல்நிலை சீராக இருப்பதாகவும், விரைவில் மருத்துவமனையில் இருந்து அவர் வீடு திரும்புவார் என்றும் மருத்துவமனை நிர்வாகம் தெரிவித்துள்ளது.

ஒரு அங்குலம் நகர்ந்திருந்தாலும் உயிருக்கு ஆபத்து!

இந்தச் சம்பவம் குறித்து மருத்துவர்கள் கூறுகையில், கத்தரிக்கோல் மேலும் ஒரு அங்குலம் மேலே அல்லது பக்கவாட்டில் நகர்ந்திருந்தால் சிறுமியின் மூச்சுக்குழாய் அல்லது நுரையீரல் கடுமையாகப் பாதிக்கப்பட்டிருக்கலாம். மேலும், விலா எலும்புகளுக்கு இடையில் உள்ள ரத்த நாளங்களில் காயம் ஏற்பட்டு அதிக ரத்தப்போக்கு உண்டாகியிருக்கலாம் என்றும் தெரிவித்தனர்.

சிறுமியின் வயது மற்றும் உடல் அளவு காரணமாக கத்தரிக்கோல் எலும்பைத் தாண்டி ஆழமாகச் செல்லவில்லை. இதனால் மிகப்பெரிய பாதிப்பு தவிர்க்கப்பட்டதாக மருத்துவர்கள் விளக்கினர்.

பெற்றோருக்கு மருத்துவர்கள் எச்சரிக்கை

இந்தச் சம்பவத்தைத் தொடர்ந்து, குழந்தைகள் விளையாடும் பொருட்கள் குறித்து பெற்றோர் தொடர்ந்து கண்காணிக்க வேண்டும் என்று மருத்துவமனை கண்காணிப்பாளர் டாக்டர் ராகேஷ் ஜோஷி அறிவுறுத்தியுள்ளார்.

குறிப்பாக, கத்தரிக்கோல், கத்தி போன்ற கூர்மையான பொருட்களை குழந்தைகளுக்கு எட்டும் இடத்தில் வைக்கக் கூடாது என்றும், குழந்தைகளுக்கு திடீரென மூச்சுத்திணறல் ஏற்பட்டால் உடனடியாக மருத்துவமனைக்கு அழைத்துச் செல்ல வேண்டும் என்றும் அவர் வலியுறுத்தியுள்ளார்.