கால்நடை தீவன மேம்பாடு: மாநிலங்களுக்கு மத்திய அரசு புதிய அறிவுறுத்தல்! 22 முக்கியப் பணிகளுக்கு அனுமதி

கால்நடை தீவன உற்பத்தியை அதிகரிக்க மத்திய அரசு நடவடிக்கை!

நாடு முழுவதும் கால்நடை தீவன உற்பத்தியை அதிகரிக்கவும், கால்நடை வளர்ப்புக்கான அடிப்படை வசதிகளை மேம்படுத்தவும் மத்திய அரசு புதிய நடவடிக்கையை மேற்கொண்டுள்ளது. இதற்காக மாநிலங்கள் மற்றும் யூனியன் பிரதேசங்களுக்கு மத்திய அரசு முக்கிய அறிவுறுத்தல்களை வழங்கியுள்ளது.

மத்திய ஊரக வளர்ச்சித் துறை மற்றும் மீன்வளம், கால்நடை பராமரிப்பு மற்றும் பால்வளத் துறை ஆகியவை இணைந்து இந்த அறிவுறுத்தலை வெளியிட்டுள்ளன.

375 பணிகளில் 22 பணிகளுக்கு முக்கியத்துவம்!

மத்திய அரசு கொண்டுவந்துள்ள 'வளர்ந்த பாரத கிராம வேலை உறுதி மற்றும் வாழ்வாதார திட்டத்தின்' (VB-G RAM G) கீழ் அனுமதிக்கப்பட்டுள்ள 375 பணிகளில் இருந்து, கால்நடை தீவன மேம்பாடு தொடர்பான 22 பணிகளை மாநிலங்கள் அடையாளம் கண்டு செயல்படுத்தலாம் என அறிவுறுத்தப்பட்டுள்ளது.

இதில் தனிநபர் குடும்பங்கள் மற்றும் சமூகங்களுக்கான தீவன சாகுபடி, தீவன சேமிப்பு, மேய்ச்சல் நிலங்களை மேம்படுத்துதல், தீவன வங்கிகள் அமைத்தல் உள்ளிட்ட பணிகள் இடம்பெற்றுள்ளன.

கால்நடை வளர்ப்புக்கான அடிப்படை வசதிகள் மேம்பாடு!

கால்நடைகளுக்கான கொட்டகைகள் அமைத்தல் மற்றும் பராமரித்தல், சமூக பால் சேகரிப்பு மையங்கள் உருவாக்குதல், கால்நடை மருத்துவ மையங்கள் அமைத்தல், கால்நடைகளுக்கான குடிநீர் தொட்டிகள் அமைத்தல் போன்ற பணிகளுக்கும் முக்கியத்துவம் அளிக்கப்பட்டுள்ளது.

மேலும், கால்நடைகளுக்குத் தேவையான பசுந்தீவன உற்பத்தியை அதிகரிப்பதற்கும், மேய்ச்சல் நிலங்களைப் பாதுகாப்பதற்கும் திட்டமிடப்பட்டுள்ளது.

30 சதவீதத்திற்கும் அதிகமான கால்நடை சார்ந்த மக்கள் வசிக்கும் பகுதிகளுக்கு முன்னுரிமை!

கிராமப்புறங்களில் 30 சதவீதத்திற்கும் அதிகமான மக்கள் கால்நடை வளர்ப்பைச் சார்ந்து வாழும் பகுதிகளில், இந்த மேம்பாட்டுப் பணிகளை மேற்கொள்ள கிராம ஊராட்சிகள் சிறப்பு கவனம் செலுத்தலாம் என அறிவுறுத்தப்பட்டுள்ளது.

இதற்காக ஊரக வளர்ச்சி, கால்நடை பராமரிப்பு, வேளாண்மை உள்ளிட்ட துறைகளை ஒருங்கிணைத்து மாநில அளவிலான விரிவான செயல்திட்டங்களை உருவாக்கவும் மத்திய அரசு வலியுறுத்தியுள்ளது.

கிராமப்புற வாழ்வாதாரத்தை மேம்படுத்த இலக்கு!

இந்த நடவடிக்கையின் மூலம் கால்நடை தீவனப் பற்றாக்குறையை குறைப்பதுடன், சிறு மற்றும் குறு விவசாயிகள், கால்நடை வளர்ப்போர் மற்றும் கிராமப்புற மக்களின் வாழ்வாதாரத்தை மேம்படுத்த முடியும் என எதிர்பார்க்கப்படுகிறது.

மேலும், புதிய திட்டத்தின் கீழ் கிராமப்புற குடும்பங்களுக்கு ஆண்டுக்கு 125 நாட்கள் வேலைவாய்ப்பு வழங்குவதற்கான சட்டப்பூர்வ உத்தரவாதமும் இடம்பெற்றுள்ளது.