திருச்சி கிழக்கில் விஜய் ராஜினாமா? இடைத்தேர்தலில் களமிறங்குகிறாரா த்ரிஷா? தவெக வட்டாரத்தில் பரபரப்பு!
தமிழக சட்டமன்றத் தேர்தலில் பெரம்பூர் மற்றும் திருச்சி கிழக்கு ஆகிய இரு தொகுதிகளிலும் தவெக தலைவர் விஜய் முன்னிலையில் உள்ள நிலையில், அவர் திருச்சி கிழக்கு தொகுதியை ராஜினாமா செய்ய வாய்ப்புள்ளதாகவும், அங்கு நடிகை த்ரிஷா போட்டியிடக்கூடும் என்றும் தகவல்கள் வெளியாகியுள்ளன.
தமிழக சட்டமன்றத் தேர்தல் வாக்கு எண்ணிக்கையில், தமிழக வெற்றிக் கழகம் (தவெக) தற்போதைய நிலவரப்படி 100-க்கும் மேற்பட்ட தொகுதிகளில் முன்னிலை வகித்து மிகப்பெரிய அரசியல் மாற்றத்தை ஏற்படுத்தி வருகிறது. குறிப்பாக, தவெக தலைவர் விஜய் போட்டியிட்ட பெரம்பூர் மற்றும் திருச்சி கிழக்கு ஆகிய இரு தொகுதிகளிலும் பெரும் வாக்கு வித்தியாசத்தில் முன்னிலையில் இருக்கிறார். மதியம் 1 மணி நிலவரப்படி, பெரம்பூரில் சுமார் 45,000 வாக்குகளும், திருச்சி கிழக்கில் சுமார் 32,000 வாக்குகளும் பெற்று எதிரணி வேட்பாளர்களைப் பின்னுக்குத் தள்ளியுள்ளார்.
ஒரு பதவியை ராஜினாமா செய்யும் சூழல்
சட்டவிதிப்படி ஒருவர் இரு தொகுதிகளில் வெற்றி பெற்றால், ஏதேனும் ஒரு தொகுதியை 14 நாட்களுக்குள் ராஜினாமா செய்ய வேண்டும். விஜய் தனது அரசியல் பயணத்தின் முக்கிய மையமாக சென்னையை (பெரம்பூர்) தக்க வைத்துக் கொள்ள விரும்புவதால், திருச்சி கிழக்கு தொகுதி உறுப்பினர் பதவியை அவர் ராஜினாமா செய்ய அதிக வாய்ப்புள்ளதாக அரசியல் விமர்சகர்கள் கருதுகின்றனர்.
களமிறங்குகிறாரா நடிகை த்ரிஷா?
விஜய் ராஜினாமா செய்யும் பட்சத்தில், அடுத்த 6 மாதங்களுக்குள் திருச்சி கிழக்கு தொகுதிக்கு இடைத்தேர்தல் நடத்தப்படும். இந்த இடைத்தேர்தலில் தவெக சார்பில் நடிகை த்ரிஷா வேட்பாளராக நிறுத்தப்படலாம் என அக்கட்சி வட்டாரங்கள் தெரிவிக்கின்றன. நீண்ட காலமாகவே தனக்கு அரசியலில் ஆர்வம் இருப்பதாக த்ரிஷா கூறி வந்த நிலையில், தற்போது தவெக முன்னிலையில் இருக்கும் சூழலில் அவர் விஜய்யின் இல்லத்திற்கு நேரில் சென்று வாழ்த்துத் தெரிவித்தது இந்த யூகங்களுக்கு வலு சேர்த்துள்ளது.
விஜய் இல்லத்தில் முக்கிய ஆலோசனை
வாக்கு எண்ணிக்கையில் தவெக அபாரமான வெற்றியை நோக்கிச் செல்லும் நிலையில், விஜய்யின் இல்லத்தில் தேர்தல் வியூக வகுப்பாளர் ஜான் ஆரோக்கியசாமி மற்றும் விஷ்ணு ரெட்டி ஆகியோருடன் முக்கிய ஆலோசனைகள் நடைபெற்று வருகின்றன. இந்த ஆலோசனைக் கூட்டத்தில் த்ரிஷாவும் பங்கேற்றுள்ளதால், வரும் நாட்களில் அவருக்குக் கட்சியில் முக்கியப் பொறுப்பு வழங்கப்படலாம் அல்லது திருச்சி கிழக்கு இடைத்தேர்தல் வேட்பாளராக அறிவிக்கப்படலாம் என எதிர்பார்க்கப்படுகிறது.
0 Comments
No comments yet. Be the first to comment.