நடிகர் அர்ஜுன் தாஸுக்கு ரகசிய நிச்சயதார்த்தமா? தீயாய் பரவும் செய்திக்கு மேலாளர் கொடுத்த அதிரடி விளக்கம்!
கைதி, மாஸ்டர் பட புகழ் நடிகர் அர்ஜுன் தாஸுக்கு இந்த வாரம் ரகசியமாக நிச்சயதார்த்தம் நடக்கப்போவதாக பரவி வரும் செய்திகளுக்கு அவரது மேலாளர் அதிகாரப்பூர்வமாக விளக்கம் அளித்துள்ளார்.
லோகேஷ் கனகராஜ் இயக்கத்தில் வெளியான ‘கைதி’ திரைப்படத்தில் மிரட்டலான வில்லனாக அறிமுகமாகி, தனது கணீரென்ற காந்தக் குரலால் ஒட்டுமொத்த தமிழ் சினிமா ரசிகர்களையும் கவர்ந்தவர் நடிகர் அர்ஜுன் தாஸ். தொடர்ந்து மாஸ்டர், விக்ரம், அநீதி, ரசவாதி, போர் என பல படங்களில் வெரைட்டியான கதாபாத்திரங்களில் நடித்து இன்று தமிழ் சினிமாவில் தவிர்க்க முடியாத ஒரு நட்சத்திரமாக உயர்ந்துள்ளார்.
சமூக வலைத்தளங்களில் வைரலான நிச்சயதார்த்த செய்தி
கடந்த சில தினங்களாகவே சமூக வலைத்தளங்களில் நடிகர் அர்ஜுன் தாஸ் குறித்த ஒரு சுவாரஸ்யமான தகவல் காட்டுத்தீயாய் பரவி வந்தது. அர்ஜுன் தாஸ் பிரபல நடிகை ஒருவரை காதலிப்பதாகவும், இந்த வாரத்தில் அவருக்கு மிக நெருங்கிய உறவினர்கள் மற்றும் நண்பர்கள் முன்னிலையில் ரகசியமாக திருமண நிச்சயதார்த்தம் (Engagement) நடைபெற உள்ளதாகவும் கிசுகிசுக்கப்பட்டது. இதனால் மணப்பெண் யார் என்று தெரியாமல் ரசிகர்கள் பலரும் சமூக வலைத்தளங்களில் கேள்வி எழுப்பி வந்தனர்.
மேலாளர் வெளியிட்ட அதிகாரப்பூர்வ விளக்கம்
இந்த வதந்திகளுக்கு முற்றுப்புள்ளி வைக்கும் வகையில் அர்ஜுன் தாஸின் மக்கள் தொடர்பு மேலாளர் (PRO) யுவராஜ் தனது அதிகாரப்பூர்வ எக்ஸ் (X) பக்கத்தில் விளக்கமளித்துள்ளார்.
அவர் வெளியிட்டுள்ள பதிவில்:
"அனைவருக்கும் வணக்கம், நடிகர் அர்ஜுன் தாஸின் திருமணம் குறித்து சமூக வலைத்தளங்களில் பரவி வரும் செய்திகளில் எந்தவித உண்மையும் இல்லை என்பதை தெளிவுபடுத்த விரும்புகிறோம். ஊடக நண்பர்கள் இதுபோன்ற செய்திகளை வெளியிடுவதற்கு முன் எங்களை தொடர்பு கொண்டு உண்மைத்தன்மையை சரிபார்க்குமாறு கேட்டுக்கொள்கிறோம்."
இதன் மூலம் அர்ஜுன் தாஸுக்கு தற்போது திருமணம் அல்லது நிச்சயதார்த்தம் எதுவும் நடைபெறவில்லை என்பதும், பரவிய செய்திகள் அனைத்தும் வெறும் வதந்தி என்பதும் உறுதியாகியுள்ளது.
அடுத்தடுத்த படங்களில் பிஸியான அர்ஜுன் தாஸ்
தற்போது அர்ஜுன் தாஸ் கைவசம் 'கான் சிட்டி' (Con City) மற்றும் 'ஒன்ஸ்மோர்' (Once More) ஆகிய படங்கள் உள்ளன. இதில் ஹரிஷ் துரைராஜ் இயக்கத்தில் அர்ஜுன் தாஸ், அன்னா பென் மற்றும் யோகி பாபு நடித்துள்ள 'கான் சிட்டி' திரைப்படம் வரும் ஜூன் 26-ஆம் தேதி திரையரங்குகளில் வெளியாக தயாராகி வருவது குறிப்பிடத்தக்கது.
0 Comments
No comments yet. Be the first to comment.