1983-ல் ஆயுள் தண்டனை... பரோலில் தப்பிய கைதி 40 ஆண்டுகள் ஆசிரியராக பணியாற்றிய அதிர்ச்சி சம்பவம்!

தெலங்கானாவில் 1983ஆம் ஆண்டு கொலை வழக்கில் ஆயுள் தண்டனை விதிக்கப்பட்ட கைதி ஒருவர், பரோலில் வெளியே சென்ற பின்னர் மீண்டும் சிறைக்கு திரும்பாமல் சுமார் 40 ஆண்டுகள் தலைமறைவாக வாழ்ந்த சம்பவம் தற்போது வெளிச்சத்திற்கு வந்துள்ளது. இந்த காலகட்டத்தில் அவர் அரசு பள்ளி ஆசிரியராக பணியாற்றி, சிறந்த ஆசிரியர் விருதையும் பெற்று, இறுதியில் பணியில் இருந்து ஓய்வு பெற்றிருப்பது பெரும் அதிர்ச்சியை ஏற்படுத்தியுள்ளது.

1983-ல் ஆயுள் தண்டனை

மஹபூபாபாத் மாவட்டத்தைச் சேர்ந்த சந்தெல வீரண்ணா என்பவருக்கு, 1983ஆம் ஆண்டு வாரங்கல் கூடுதல் மாவட்ட நீதிமன்றம் கொலை வழக்கில் ஆயுள் தண்டனை விதித்தது. இதையடுத்து அவர் வாரங்கல் மத்திய சிறையில் அடைக்கப்பட்டார். கொலை வழக்குடன் தொடர்புடைய சட்டப்பிரிவுகளின் கீழ் அவருக்கு தண்டனை விதிக்கப்பட்டிருந்தது.

30 நாள் பரோல்... அதன்பின் திரும்பவே இல்லை

1983 டிசம்பர் 17ஆம் தேதி வீரண்ணாவுக்கு 30 நாட்கள் பரோல் வழங்கப்பட்டது. பின்னர் அந்த பரோல் காலம் 1984 மார்ச் 17ஆம் தேதி வரை நீட்டிக்கப்பட்டது. மார்ச் 18ஆம் தேதி மீண்டும் சிறையில் சரணடைய வேண்டிய நிலையில், அவர் சிறைக்கு திரும்பவில்லை.

அதன்பிறகு பல ஆண்டுகள் அவர் தலைமறைவாகவே இருந்ததாக நீதிமன்ற ஆவணங்களில் தெரிவிக்கப்பட்டுள்ளது. 

அரசுப் பள்ளி ஆசிரியராக வாழ்க்கை

சிறைக்கு திரும்பாமல் வெளியே இருந்த வீரண்ணா, மஹபூபாபாத் மாவட்டத்திலேயே வசித்து வந்ததாக கூறப்படுகிறது. அங்கு அரசுப் பள்ளி ஆசிரியராக பணியில் சேர்ந்த அவர், தனது குற்றப்பின்னணியை மறைத்து அரசு வேலை பெற்றதாக நீதிமன்றம் குறிப்பிட்டுள்ளது.

மேலும், அவர் 2004ஆம் ஆண்டு சிறந்த ஆசிரியர் விருதையும் பெற்றுள்ளார். தொடர்ந்து பணியாற்றி 2013ஆம் ஆண்டு அரசு பணியில் இருந்து ஓய்வு பெற்றுள்ளார்.

40 ஆண்டுகளுக்குப் பிறகு கைது

சுமார் நான்கு தசாப்தங்கள் கடந்த நிலையில், தெலங்கானா சிறைத்துறை அமைத்த சிறப்பு பணிக்குழுவினர் அவரை கண்டுபிடித்தனர். 2024 மே 16ஆம் தேதி அவர் கைது செய்யப்பட்டார். பரோல் முடிந்து சிறைக்கு திரும்ப வேண்டிய நாளிலிருந்து கணக்கிட்டால், சுமார் 40 ஆண்டுகள், ஒரு மாதம் மற்றும் 28 நாட்கள் கழித்து அவர் பிடிபட்டதாக தகவல்கள் தெரிவிக்கின்றன

மனைவி தொடர்ந்த வழக்கு

வீரண்ணாவின் மனைவி, அவரது வயது மற்றும் உடல்நிலையை கருத்தில் கொண்டு பரோல் வழங்க வேண்டும் எனக் கோரி தெலங்கானா உயர் நீதிமன்றத்தில் மனு தாக்கல் செய்தார். மேலும், இத்தனை ஆண்டுகளுக்குப் பிறகு சிறைத்துறை நடவடிக்கை எடுத்திருப்பது குறித்தும் கேள்வி எழுப்பப்பட்டது.

ஆனால், அவரது ஆயுள் தண்டனை ரத்து செய்யப்படாத நிலையில், அவர் தண்டனையைத் தவிர்த்து வேண்டுமென்றே தலைமறைவாக இருந்ததாக நீதிமன்றம் கூறியது. அரசு ஆசிரியராக பணியாற்றியதும், தனது குற்றத் தீர்ப்பை மறைத்து அரசு வேலையை பெற்றதும் நீதிமன்றத்தின் கவனத்திற்கு வந்தது.

சிறைத்துறைக்கு உயர் நீதிமன்றம் கடும் கண்டனம்

இந்த வழக்கில் முக்கியமாக, கைதி ஒருவர் 40 ஆண்டுகள் சிறைக்கு வெளியே இருந்து அரசு வேலையில் சேர்ந்து, ஓய்வு பெறும் வரை பணியாற்றியதை சிறைத்துறை கண்டறிய முடியாதது குறித்து தெலங்கானா உயர் நீதிமன்றம் கவலை தெரிவித்தது.

பரோலில் செல்லும் கைதிகளை முறையாக கண்காணிக்கவும், பரோல் காலம் முடிந்தவுடன் அவர்கள் சிறைக்கு திரும்புவதை உறுதி செய்யவும் புதிய வழிகாட்டுதல்கள் மற்றும் கண்காணிப்பு அமைப்பை உருவாக்க வேண்டும் என்று நீதிமன்றம் உத்தரவிட்டது.

மேலும், பரோலில் வெளியே செல்லும் கைதிகள் மீது தீவிர கண்காணிப்பு மேற்கொள்ள சிறப்பு பணிக்குழுக்களை அமைக்கவும் அதிகாரிகளுக்கு நீதிமன்றம் அறிவுறுத்தியுள்ளது.

மனு தள்ளுபடி

வீரண்ணாவுக்கு மருத்துவ காரணங்களுக்காக பரோல் வழங்க வேண்டும் என்ற கோரிக்கையையும் நீதிமன்றம் ஏற்கவில்லை. சிறையில் மருத்துவ வசதிகள் இருப்பதாக அரசு தரப்பில் தெரிவிக்கப்பட்டதை நீதிமன்றம் கருத்தில் கொண்டது.

இறுதியில், அவரது மனைவி தாக்கல் செய்த மனுவை தெலங்கானா உயர் நீதிமன்றம் தள்ளுபடி செய்ததுடன், பரோலில் செல்லும் கைதிகளை கண்காணிக்கும் நடைமுறையை வலுப்படுத்த வேண்டிய அவசியத்தையும் தெளிவுபடுத்தியுள்ளது.

இந்த சம்பவம் எழுப்பும் முக்கிய கேள்வி

ஒரு ஆயுள் தண்டனை கைதி பரோலில் வெளியேறி, சுமார் 40 ஆண்டுகள் சிறைக்கு திரும்பாமல் இருந்து, அரசு பணியில் சேர்ந்து, விருதும் பெற்று, ஓய்வு பெறும் வரை அதிகாரிகளின் கண்காணிப்பில் சிக்காமல் இருந்தது சிறைத்துறை கண்காணிப்பு அமைப்பில் ஏற்பட்ட மிகப்பெரிய குறைபாட்டை வெளிப்படுத்தியுள்ளது. இதுபோன்ற சம்பவங்கள் மீண்டும் நடைபெறாமல் இருக்க புதிய கண்காணிப்பு முறைகளை உருவாக்க வேண்டும் என்பதே இந்த வழக்கின் முக்கியத்துவமாக பார்க்கப்படுகிறது.