நானி நடித்துள்ள ‘தி பாரடைஸ்’ படத்தின் புதிய ரிலீஸ் தேதி அறிவிப்பு.. தள்ளிப்போகும் வதந்திகளுக்கு முற்றுப்புள்ளி!
நானியின் ‘தி பாரடைஸ்’ ரிலீஸ் தள்ளிப்போகிறதா? வதந்திகளுக்கு முற்றுப்புள்ளி வைத்த படக்குழு! ஸ்ரீகாந்த் ஒடேலா இயக்கியுள்ள இந்த பிரம்மாண்ட ஆக்ஷன் திரைப்படம் செப்டம்பர் 24, 2026 அன்று உலகம் முழுவதும் திரையரங்குகளில் வெளியாகிறது
நானி நடிப்பில், ‘தசரா’ பட இயக்குநர் ஸ்ரீகாந்த் ஒடேலா இயக்கியுள்ள ‘தி பாரடைஸ்’ (The Paradise) திரைப்படம் வரும் செப்டம்பர் 24, 2026 அன்று உலகம் முழுவதும் திரையரங்குகளில் வெளியாகும் என படக்குழு மீண்டும் உறுதி செய்துள்ளது. படத்தின் வெளியீடு தள்ளிப்போகும் என சமூக வலைதளங்களில் தகவல்கள் பரவிய நிலையில், புதிய போஸ்டர் மூலம் ரிலீஸ் தேதியை தயாரிப்பு நிறுவனம் உறுதிப்படுத்தியுள்ளது.
‘தசரா’ கூட்டணி மீண்டும்
2023-ல் வெளியான ‘தசரா’ படத்தின் வெற்றிக்குப் பிறகு நடிகர் நானி மற்றும் இயக்குநர் ஸ்ரீகாந்த் ஒடேலா மீண்டும் இணைந்துள்ள படம் ‘தி பாரடைஸ்’. இந்தப் படத்திற்கு அனிருத் ரவிச்சந்தர் இசையமைத்துள்ளார். நானியுடன் கயாடு லோஹர், மோகன் பாபு, ராகவ் ஜுயல் உள்ளிட்டோர் முக்கிய கதாபாத்திரங்களில் நடித்துள்ளனர்.
1980-களின் செகந்திராபாத் பின்னணி
1980-களின் செகந்திராபாத் பின்னணியில் கதை அமைக்கப்பட்டுள்ளது. அடிப்படை உரிமைகள் மறுக்கப்பட்ட ஒரு ஒடுக்கப்பட்ட சமூகத்தின் போராட்டத்தையும், அவர்களை ஒன்றிணைத்து வழிநடத்தும் ஒருவரின் எழுச்சியையும் மையமாகக் கொண்டு ஆக்ஷன் கதையாக படம் உருவாகியுள்ளது.
8 மொழிகளில் பிரம்மாண்ட வெளியீடு
‘தி பாரடைஸ்’ திரைப்படம் தமிழ், தெலுங்கு, இந்தி, மலையாளம், கன்னடம், வங்காளம், ஆங்கிலம் மற்றும் ஸ்பானிஷ் என 8 மொழிகளில் வெளியாக திட்டமிடப்பட்டுள்ளது. முன்னதாக ரிலீஸ் தேதி பலமுறை மாற்றப்பட்ட நிலையில், தற்போது செப்டம்பர் 24 வெளியீடு உறுதி செய்யப்பட்டுள்ளதாக படக்குழுவின் புதிய அறிவிப்பு தெரிவிக்கிறது.
ரிலீஸ் தள்ளிப்போகிறதா?
படத்தின் சில பணிகள் முடிவடையாததால் வெளியீடு தள்ளிப்போகலாம் என்ற தகவல்கள் சமீபத்தில் வெளியாகின. ஆனால் தற்போது புதிய ரிலீஸ் போஸ்டரை வெளியிட்டுள்ள படக்குழு, செப்டம்பர் 24-ம் தேதியே படம் திரைக்கு வரும் என உறுதிப்படுத்தியுள்ளது.
0 Comments
No comments yet. Be the first to comment.