கிரானைட் தொழிலதிபர் வீரமணி மீதான போக்சோ வழக்கு: விசாரணையை தீவிரப்படுத்த முதல்-அமைச்சர் விஜய் உத்தரவு!

சென்னையைச் சேர்ந்த கிரானைட் தொழிலதிபர் ஆர். வீரமணி மீது சிறுமி மீதான பாலியல் குற்றச்சாட்டு தொடர்பாக போக்சோ சட்டத்தின் கீழ் வழக்குப்பதிவு செய்யப்பட்டு, அவர் கைது செய்யப்பட்டுள்ளார். இந்த வழக்கில் அவருக்கு உதவியதாகக் கூறப்படும் சாந்தி மற்றும் அவரது கணவர் மகேந்திர சிம்ஹன் ஆகியோரும் காவல்துறையினரால் கைது செய்யப்பட்டுள்ளனர்.

கடந்த 2025-ம் ஆண்டு அக்டோபர் மாதம் தன்னார்வலர் ஒருவர் காவல்துறையிடம் அளித்த புகாரின் அடிப்படையில் இந்த வழக்கு பதிவு செய்யப்பட்டதாக தகவல்கள் தெரிவிக்கின்றன. புகாருடன் வழங்கப்பட்ட பென்டிரைவில் சிறுமி தொடர்பான பாலியல் குற்றச்சாட்டை காட்டும் வீடியோ இருந்ததாகவும், அதன் அடிப்படையில் காவல்துறையினர் விசாரணையை தொடங்கியதாகவும் தெரிவிக்கப்பட்டுள்ளது.

விசாரணையின் ஒரு பகுதியாக வீரமணியுடன் தொடர்புடைய இடங்களில் சோதனை நடத்தப்பட்டு, வீடியோ ஆதாரங்கள் மற்றும் புகைப்படங்கள் உள்ளிட்ட சில முக்கிய ஆதாரங்கள் கைப்பற்றப்பட்டதாக காவல்துறை தரப்பை மேற்கோள் காட்டி செய்திகள் தெரிவிக்கின்றன. இதையடுத்து வீரமணி உள்ளிட்ட மூவர் கைது செய்யப்பட்டு நீதிமன்றக் காவலில் சிறையில் அடைக்கப்பட்டனர். 

மேலும், 2019-ம் ஆண்டு நடைபெற்றதாகக் கூறப்படும் சம்பவத்தில் பாதிக்கப்பட்டதாகக் கூறப்படும் சிறுமியை காவல்துறையினர் அடையாளம் கண்டுள்ளதாகவும், அவரது வாக்குமூலம் பதிவு செய்யப்பட்டு நீதிமன்றத்தில் சமர்ப்பிக்கப்பட்டுள்ளதாகவும் Indian Express செய்தி வெளியிட்டுள்ளது. பாதிக்கப்பட்டவர் பட்டியலின சமூகத்தைச் சேர்ந்தவர் என்பதால், சம்பந்தப்பட்ட சட்டப்பிரிவுகளும் வழக்கில் சேர்க்கப்பட்டுள்ளதாக காவல்துறை வட்டாரங்களை மேற்கோள் காட்டி அந்த செய்தி தெரிவிக்கிறது.

இதற்கிடையே, இந்த வழக்கில் மேலும் பல சிறுமிகள் பாதிக்கப்பட்டிருக்கலாம் என்ற கோணத்திலும் காவல்துறையினர் விசாரணை மேற்கொண்டு வருவதாக செய்திகள் தெரிவிக்கின்றன. குற்றச்சாட்டுகள் தொடர்பான உண்மைத்தன்மை, மேலும் யாருக்கெல்லாம் தொடர்பு உள்ளது, ஆதாரங்கள் எவ்வாறு கிடைத்தன என்பன குறித்து விசாரணை தொடர்ந்து நடைபெற்று வருகிறது.

இந்த நிலையில், வீரமணி மீதான வழக்கில் தொடர்புடைய அனைவரிடமும் தீவிர விசாரணை நடத்தி, சட்டப்படி நடவடிக்கை எடுக்க வேண்டும் என முதல்-அமைச்சர் விஜய் காவல்துறைக்கு உத்தரவிட்டதாக தினத்தந்தி செய்தி வெளியிட்டுள்ளது. சென்னை காவல் ஆணையர் அமல்ராஜுடன் முதல்-அமைச்சர் இரண்டு முறை ஆலோசனை நடத்தியதாகவும் அந்த செய்தியில் குறிப்பிடப்பட்டுள்ளது.