உத்தர பிரதேசம் கிரேட்டர் நொய்டா அருகே யமுனா எக்ஸ்பிரஸ்வேயில் பயணிகள் பேருந்து தீப்பிடித்து எரிந்த விபத்தில் 9 பேர் உயிரிழந்தனர். பலர் காயமடைந்த நிலையில் மருத்துவமனையில் சிகிச்சை பெற்று வருகின்றனர்.
உத்தர பிரதேச மாநிலம்
கிரேட்டர் நொய்டா அருகே யமுனா எக்ஸ்பிரஸ்வேயில் பயணிகள் பேருந்து தீப்பிடித்து எரிந்ததில் 9 பேர் உயிரிழந்தனர். இந்த விபத்து புதன்கிழமை நள்ளிரவில் தயானத்பூர் கிராமம் அருகே நடைபெற்றதாக தகவல்கள் தெரிவிக்கின்றன.
நொய்டாவில் இருந்து மகோபா நோக்கி சென்ற தனியார் ஏசி ஸ்லீப்பர் பேருந்தில் சுமார் 35 பேர் பயணம் செய்துள்ளனர். பேருந்து யமுனா எக்ஸ்பிரஸ்வேயில் சென்று கொண்டிருந்தபோது திடீரென தீப்பிடித்துள்ளது. பேருந்து ஓட்டுநர் உடனடியாக வாகனத்தை சாலையோரம் நிறுத்தியுள்ளார். எனினும், தீ வேகமாக பேருந்து முழுவதும் பரவியதாக கூறப்படுகிறது.
தீ விபத்து ஏற்பட்டபோது பல பயணிகள் தூங்கிக் கொண்டிருந்ததாகவும், பேருந்துக்குள் புகை சூழ்ந்ததால் அவர்கள் கடும் சிரமத்திற்கு உள்ளானதாகவும் தகவல்கள் வெளியாகியுள்ளன. சில பயணிகள் ஜன்னல்கள் வழியாக குதித்து உயிர் தப்பியுள்ளனர். தீயில் சிக்கிய 9 பேர் உயிரிழந்தனர். மேலும் பலர் காயமடைந்த நிலையில் மருத்துவமனையில் சிகிச்சைக்காக அனுமதிக்கப்பட்டுள்ளனர்.
தகவல் அறிந்து சம்பவ இடத்திற்கு தீயணைப்பு வீரர்கள் மற்றும் போலீசார் விரைந்து சென்று மீட்பு பணியில் ஈடுபட்டனர். சுமார் 30 நிமிட போராட்டத்திற்குப் பிறகு தீ கட்டுக்குள் கொண்டுவரப்பட்டதாக தகவல்கள் தெரிவிக்கின்றன.
பேருந்தில் தீ விபத்து ஏற்பட்டதற்கான சரியான காரணம் இதுவரை உறுதி செய்யப்படவில்லை. சம்பவம் குறித்து போலீசார் விசாரணை நடத்தி வருகின்றனர். உத்தர பிரதேச முதலமைச்சர் யோகி ஆதித்யநாத் உயிரிழந்தவர்களின் குடும்பத்தினருக்கு இரங்கல் தெரிவித்ததுடன், காயமடைந்தவர்களுக்கு உரிய மருத்துவ சிகிச்சை வழங்க அதிகாரிகளுக்கு உத்தரவிட்டுள்ளார்.
Popular News
View All
0 Comments
No comments yet. Be the first to comment.