திருப்பூர் மருத்துவமனையில் ஆக்சிஜன் தீர்ந்ததால் தனியார் நிறுவன மேலாளர் உயிரிழந்ததாக குற்றச்சாட்டு – உறவினர்கள் சாலை மறியல்!
திருப்பூரில் மருத்துவமனையில் சிகிச்சை பெற்று வந்த தனியார் நிறுவன மேலாளர் விக்னேஷ், ஸ்கேன் பரிசோதனைக்காக அழைத்துச் செல்லப்பட்டபோது ஆக்சிஜன் தீர்ந்ததால் மூச்சுத்திணறல் ஏற்பட்டு உயிரிழந்ததாக அவரது உறவினர்கள் குற்றம்சாட்டியுள்ளனர். இதனைத் தொடர்ந்து மருத்துவமனை முன்பு உறவினர்கள் சாலை மறியலில் ஈடுபட்டதால் பரபரப்பு ஏற்பட்டது.
திருப்பூர்,
திருப்பூர் மாவட்டம் வீரபாண்டி பகுதியைச் சேர்ந்த 38 வயதான விக்னேஷ் என்பவர், பெருமாநல்லூரில் உள்ள தனியார் பின்னலாடை நிறுவனத்தில் மேலாளராக பணியாற்றி வந்தார். இவர் கடந்த 15 நாட்களுக்கு முன்பு இருசக்கர வாகனத்தில் சென்றபோது, சாலையின் குறுக்கே வந்த மான் மோதியதில் தலையில் பலத்த காயம் ஏற்பட்டு மருத்துவமனையில் அனுமதிக்கப்பட்டார்.
இந்நிலையில், அவரை ஸ்கேன் பரிசோதனைக்காக மருத்துவமனை ஊழியர்கள் அழைத்துச் சென்றபோது, அவருக்கு வழங்கப்பட்ட ஆக்சிஜன் தீர்ந்ததாக உறவினர்கள் குற்றம்சாட்டியுள்ளனர்.
ஆக்சிஜன் தீர்ந்ததால் விக்னேஷுக்கு திடீரென மூச்சுத்திணறல் ஏற்பட்டதாகவும், தொடர்ந்து அவரது உடல்நிலை மோசமடைந்ததாகவும் உறவினர்கள் தெரிவித்துள்ளனர். பின்னர் அவர் உயிரிழந்ததாக கூறப்படுகிறது.
உறவினர்கள் சாலை மறியல்:
விக்னேஷின் உயிரிழப்புக்கு மருத்துவமனையின் அலட்சியமே காரணம் என குற்றம்சாட்டிய அவரது உறவினர்கள் மற்றும் குடும்பத்தினர், சம்பவத்தைக் கண்டித்து சாலை மறியலில் ஈடுபட்டனர். இதனால் அந்தப் பகுதியில் பரபரப்பு ஏற்பட்டது.
சம்பவம் தொடர்பாக போலீசார் மற்றும் அதிகாரிகள் விசாரணை மேற்கொண்டு வருவதாக கூறப்படுகிறது. விக்னேஷின் உயிரிழப்புக்கான உண்மையான காரணம் என்ன என்பது தொடர்பாக மருத்துவமனை நிர்வாகத்தின் விளக்கம் மற்றும் அதிகாரப்பூர்வ விசாரணை முடிவுகள் வெளியாகிய பின்னரே முழுமையான தகவல் தெரியவரும்.
Popular News
View All
0 Comments
No comments yet. Be the first to comment.