அமெரிக்கப் பண்டிகை அல்ல! ஹாலோவீன் உருவானதன் பின்னணியில் ஒளிந்துள்ள சுவாரஸ்யமான வரலாறு!

பேய் வேடங்கள், பூசணிக்காய் விளக்குகள் மற்றும் தீம் பார்ட்டிகள் என ஹாலோவீன் பண்டிகை இன்று சென்னையிலும் இந்தியாவின் பிற பெருநகரங்களிலும் ஒரு புதிய கொண்டாட்டமாக மாறிவிட்டது. இது அமெரிக்காவில் மட்டுமே உருவான பண்டிகை என பலரும் நினைப்பதுண்டு. குடும்பமாகச் சென்று பூசணிக்காய்களை வாங்கி வீடுகளை அலங்கரிப்பதும், குழந்தைகள் சாக்லேட்டுகளை வேட்டையாடுவதும் அங்கு பிரபலம் என்றாலும், பல பில்லியன் டாலர்கள் வர்த்தகத்தைக் கொண்டுள்ள இந்த ஹாலோவீன் திருவிழாவின் பின்னணியில் பல நூற்றாண்டுகால வரலாறு மறைந்துள்ளது.

ஹாலோவீனின் உண்மையான தொடக்கம் ஐரோப்பாவில் வாழ்ந்த செல்டிக் (Celtic) பழங்குடியின மக்களிடம் இருந்து ஆரம்பிக்கிறது. கோடைகாலம் முடிந்து குளிர்காலம் தொடங்குவதைக் குறிக்கும் வகையில் அவர்கள் 'சவ்வின்' (Samhain) என்ற அறுவடைத் திருவிழாவைக் கொண்டாடினர். இந்த காலக்கட்டத்தில் இறந்தவர்களின் ஆன்மாக்கள் பூமிக்கு வரும் என நம்பிய அவர்கள், ஆவிகளை குழப்புவதற்காகவும் தங்களை காப்பாற்றிக் கொள்ளவும் மிருகங்கள் போன்று வேடமிட்டனர். நெருப்பு மூட்டி கொண்டாடப்பட்ட இந்த வழக்கமே, இன்று நாம் காணும் விதவிதமான ஹாலோவீன் பேய் வேடங்களுக்கு அடிப்படை காரணமாக அமைந்தது.

காலப்போக்கில் இந்தப் பழக்கம் கிறிஸ்தவ மத நம்பிக்கைகளுடனும் ஒன்றிணைந்தது. கத்தோலிக்க கிறிஸ்தவர்கள் நவம்பர் 1-ஆம் தேதியை அனைத்து புனிதர்களுக்கான நாளாகவும் (All Saints' Day), நவம்பர் 2-ஆம் தேதியை இறந்தவர்களுக்கான நாளாகவும் அனுசரித்தனர். இந்த புனிதர்கள் நாளுக்கு முந்தைய அக்டோபர் 31-ஆம் தேதி மாலை 'ஹாலோஸ் ஈவ்' (Hallows' Eve) என அழைக்கப்பட்டு, அதுவே காலப்போக்கில் மருவி 'ஹாலோவீன்' (Halloween) என்று உருமாறியது. அக்காலத்தில் இறந்தவர்களுக்காக ஜெபிக்கும் ஏழைகளுக்கு செல்வந்தர்கள் 'சோல் கேக்' (Soul Cake) வழங்கி மகிழ்வித்த வழக்கமே இன்றைய ஹாலோவீன் இனிப்புகள் வழங்கும் முறையாக மாறியுள்ளது.

அயர்லாந்தில் ஏற்பட்ட மோசமான பஞ்சத்தால் அமெரிக்காவிற்கு இடம்பெயர்ந்த மக்கள் மூலமாகவே இந்த ஹாலோவீன் கலாச்சாரம் அங்கு பரவியது. ஐரோப்பாவில் டர்னிப் கிழங்குகளைக் குடைந்து விளக்கு செய்தவர்கள், அமெரிக்காவில் அதிகமாகக் கிடைத்த பூசணிக்காய்களைப் பயன்படுத்தத் தொடங்கினர். பின்னர் 1920-களில் ஹாலோவீன் இரவுகளில் இளைஞர்கள் செய்த சேட்டைகள் மற்றும் வன்முறைகளைத் தடுக்கவே, அவர்களுக்கு இனிப்புகளையும் சாக்லேட்டுகளையும் லஞ்சமாகக் கொடுக்கும் முறை கொண்டுவரப்பட்டது. இதுவே இன்று குழந்தைகள் சாக்லேட் வேட்டையாடும் 'ட்ரிக் ஆர் ட்ரீட்' (Trick or Treat) என்ற சுவாரஸ்யமான விளையாட்டாக உலகெங்கும் கொண்டாடப்பட்டு வருகிறது.