பள்ளிக்கூட வகுப்பறையில் கொடூரம்: 10ம் வகுப்பு மாணவி மீது ரம்பத்தால் தாக்குதல் - தடுக்க வந்த தோழிக்கும் காயம்!
ஆந்திர மாநிலம் ரப்தாடு பகுதியில் உள்ள அரசுப் பள்ளியில் 10ஆம் வகுப்பு மாணவி கோபிகா மீது அவரது உறவினரான ஹேமந்த் (21) என்பவர் மரம் அறுக்கும் மின்சார ரம்பத்தால் கொடூரமாகத் தாக்கியுள்ளார். உயிருக்கு ஆபத்தான நிலையில் அந்த மாணவியும், அவரை காப்பாற்ற முயன்ற தோழியும் மருத்துவமனையில் தீவிர சிகிச்சை பெற்று வருகின்றனர்.
ஆந்திர மாநிலம் அனந்தபூர் மாவட்டத்தில் உள்ள ரப்தாடு பகுதியில் செயல்பட்டு வரும் அரசு உயர்நிலைப் பள்ளியில் இன்று நடந்த கொடூர சம்பவம் அனைவரையும் கடும் அதிர்ச்சியில் ஆழ்த்தியுள்ளது. பள்ளியின் பாதுகாப்பைக் கேள்விக்குறியாக்கும் வகையில், வகுப்பறைக்குள் பட்டப்பகலில் அத்துமீறி நுழைந்த நபர் ஒருவர், அங்கிருந்த மாணவி மீது பயங்கர ஆயுதத்தால் கொலைவெறித் தாக்குதலை நடத்தியுள்ளார்.
பத்தாம் வகுப்பு படித்து வரும் கோபிகா என்ற மாணவி தனது சக மாணவிகளுடன் வகுப்பறையில் இருந்தபோது, ஹேமந்த் (21) என்ற இளைஞர் மரம் அறுக்கப் பயன்படுத்தப்படும் மின்சார ரம்பத்துடன் திடீரென உள்ளே புகுந்துள்ளார். அவர் கண்மூடித்தனமாக ரம்பத்தால் கோபிகாவைத் தாக்கியதில் மாணவியின் முகம், தலை மற்றும் முதுகுப் பகுதியில் பலத்த வெட்டுக்காயங்கள் ஏற்பட்டன. இந்த கொடூரத் தாக்குதலைக் கண்டு அதிர்ச்சியடைந்த கோபிகாவின் தோழி லட்சுமி, அவரைத் தடுக்க முயன்றுள்ளார். ஆத்திரமடைந்த அந்த இளைஞர் லட்சுமியையும் தாக்கியுள்ளார்.
வகுப்பறையில் மாணவிகள் அலறும் சத்தம் கேட்டு ஓடிவந்த ஆசிரியர்களும் சக மாணவர்களும் இந்த கோரச் சம்பவத்தைக் கண்டு பதறியடித்து ஓடினர். ரத்த வெள்ளத்தில் உயிருக்கு ஆபத்தான நிலையில் சரிந்து விழுந்த மாணவி கோபிகாவையும், காயமடைந்த லட்சுமியையும் உடனடியாக மீட்டு அருகில் உள்ள அரசு மருத்துவமனையின் அவசரச் சிகிச்சைப் பிரிவில் அனுமதித்தனர். அங்கு மாணவிக்கு மருத்துவர்கள் தீவிர சிகிச்சை அளித்து வருகின்றனர்.
சம்பவம் குறித்து உடனடியாக போலீசாருக்கு தகவல் தெரிவிக்கப்பட்டது. தகவலறிந்து சம்பவ இடத்திற்கு விரைந்து வந்த போலீசார், பள்ளியில் விசாரணை மேற்கொண்டனர். தாக்குதலில் ஈடுபட்ட ஹேமந்த் (21) என்பவர் மாணவி கோபிகாவின் நெருங்கிய உறவினர் என்பது விசாரணையில் தெரியவந்துள்ளது. தப்பியோடிய ஹேமந்தை போலீசார் தீவிரமாகத் தேடி வருகின்றனர். கல்வி கற்கும் இடத்தில் நடந்த இந்த கொடூர சம்பவம் அப்பகுதி மக்களிடையேயும் பெற்றோர்களிடையேயும் பெரும் அச்சத்தையும், பாதுகாப்பற்ற உணர்வையும் ஏற்படுத்தியுள்ளது.
0 Comments
No comments yet. Be the first to comment.