மகன் ராகாவின் முதல் பிறந்தநாள்... இணைந்து கொண்டாடிய மாதம்பட்டி ரங்கராஜ் – ஜாய் கிரிசில்டா!

சென்னை:

மாதம்பட்டி ரங்கராஜ் தனது மகன் ராகாவின் முதல் பிறந்தநாளை 'ஜாய் கிரிசில்டாவுடன்' இணைந்து கொண்டாடியுள்ளார். இது தொடர்பான புகைப்படங்கள் தற்போது சமூக வலைதளங்களில் வெளியாகி ரசிகர்களின் கவனத்தை ஈர்த்து வருகின்றன.

தமிழ் சினிமாவில் சமையல் கலைஞராகவும், நடிகராகவும் பிரபலமானவர் மாதம்பட்டி ரங்கராஜ். ஆடை வடிவமைப்பாளரான ஜாய் கிரிசில்டா, மாதம்பட்டி ரங்கராஜைத் திருமணம் செய்துகொண்டதாகவும், அவருக்குத் தன்னுடன் குழந்தை பிறக்கவுள்ளதாகவும் கடந்த ஆண்டு தெரிவித்திருந்தார். இந்த விவகாரம் திரையுலகில் பெரும் பரபரப்பை ஏற்படுத்தியது.

மாதம்பட்டி ரங்கராஜ் – ஜாய் கிரிசில்டா விவகாரம்

மாதம்பட்டி ரங்கராஜுக்கும் ஜாய் கிரிசில்டாவுக்கும் இடையிலான திருமண விவகாரம் தொடர்பாக இருவருக்கும் இடையே சட்டரீதியான பிரச்சினைகள் ஏற்பட்டன. இந்தச் சூழலில், கடந்த 2025ஆம் ஆண்டு அக்டோபர் 31ஆம் தேதி ஜாய் கிரிசில்டாவுக்கு ஆண் குழந்தை பிறந்தது. அந்தக் குழந்தைக்கு ராகா ரங்கராஜ் எனப் பெயரிடப்பட்டது.

குழந்தையின் தந்தை மாதம்பட்டி ரங்கராஜ்தான் என ஜாய் கிரிசில்டா தொடர்ந்து தெரிவித்து வந்தார். இதுதொடர்பாக நடைபெற்ற சட்ட நடவடிக்கைகளின் ஒரு பகுதியாக டி.என்.ஏ பரிசோதனை நடத்த நீதிமன்றம் உத்தரவிட்டது. பரிசோதனை முடிவில் குழந்தையின் உயிரியல் தந்தை மாதம்பட்டி ரங்கராஜ் என்பது உறுதியானதாக செய்திகள் வெளியாகின.

மகனின் பொறுப்பை ஏற்ற ரங்கராஜ்

டி.என்.ஏ பரிசோதனை முடிவுகள் வெளியானதைத் தொடர்ந்து, ராகா ரங்கராஜைத் தனது மகனாக ஏற்றுக்கொள்வதாக மாதம்பட்டி ரங்கராஜ் தெரிவித்திருந்தார்.

மேலும், தனது மகனின் நலன், மகிழ்ச்சி மற்றும் எதிர்காலத்திற்காக வாழ்நாள் முழுவதும் முழுப் பொறுப்புடனும் அன்புடனும் துணை நிற்பேன் என்றும் அவர் அறிவித்திருந்தார். இந்த அறிவிப்பு ஜாய் கிரிசில்டா மற்றும் அவரது குடும்பத்தினரிடையே மகிழ்ச்சியை ஏற்படுத்தியது.

மகனின் முதல் பிறந்தநாள் கொண்டாட்டம்

இந்நிலையில், கடந்த அக்டோபர் 31ஆம் தேதி ராகா ரங்கராஜின் முதல் பிறந்தநாள் கொண்டாடப்பட்டது. இந்தப் பிறந்தநாள் கொண்டாட்டத்தில் மாதம்பட்டி ரங்கராஜும் ஜாய் கிரிசில்டாவும் இணைந்திருந்ததாகப் புகைப்படங்கள் மற்றும் தகவல்கள் வெளியாகியுள்ளன.

முன்னதாக, மகன் ராகாவுக்கு மொட்டையடிக்கும் நிகழ்ச்சியிலும் மாதம்பட்டி ரங்கராஜ் கலந்து கொண்ட புகைப்படங்கள் இணையத்தில் வைரலாகின.

தற்போது மகனின் முதல் பிறந்தநாள் கொண்டாட்டம் தொடர்பான புகைப்படங்களும் சமூக வலைதளங்களில் அதிகம் பகிரப்பட்டு வருகின்றன. ஏற்கனவே பல்வேறு சர்ச்சைகளால் பேசுபொருளாக இருந்த இந்தக் குடும்ப விவகாரம், தற்போது மகனின் முதல் பிறந்தநாள் கொண்டாட்டத்தால் மீண்டும் கவனம் பெற்றுள்ளது.