“லட்சியமும் செயலும் சேர்ந்தால் எதுவும் சாத்தியம்!” – தமிழக முதல்வர் விஜய்க்கு இயக்குநர் ஷங்கர் நெகிழ்ச்சி வாழ்த்து!
தமிழக முதல்வராகப் பொறுப்பேற்றுள்ள விஜய்க்கு, ‘முதல்வன்’ பட இயக்குநர் ஷங்கர், “நிஜத்திலும் இது சாத்தியம் என நிரூபித்துவிட்டீர்கள்” என நெகிழ்ச்சியுடன் வாழ்த்து தெரிவித்துள்ளார்.
தமிழக சட்டப்பேரவைத் தேர்தலில் தனிப்பெரும் கட்சியாக உருவெடுத்துள்ள தமிழக வெற்றிக் கழகத்தின் தலைவர் விஜய், கடந்த ஞாயிற்றுக்கிழமை தமிழக முதல்வராகப் பதவியேற்றுக் கொண்டார். பெரும் போராட்டங்களுக்குப் பிறகு இந்த இலக்கை எட்டியுள்ள விஜய்க்கு, அரசியல் தலைவர்கள் மற்றும் திரைத்துறை பிரபலங்கள் தொடர்ந்து வாழ்த்துகளைத் தெரிவித்து வருகின்றனர்.
நம்பிக்கை வாக்கெடுப்பில் வெற்றி
பதவியேற்பைத் தொடர்ந்து, இன்று தமிழக சட்டமன்றத்தில் நடைபெற்ற நம்பிக்கை வாக்கெடுப்பில் முதல்வர் விஜய் தனது பெரும்பான்மையை நிரூபித்தார். மொத்தம் 144 சட்டமன்ற உறுப்பினர்களின் ஆதரவைப் பெற்று, தவெக அரசு தனது பலத்தை உறுதிப்படுத்தியுள்ளது. இதன் மூலம் விஜய்யின் அரசியல் பயணம் அடுத்தகட்டத்திற்கு நகர்ந்துள்ளது.
‘முதல்வன்’ இயக்குநர் ஷங்கரின் பாராட்டு
இந்நிலையில், விஜய்யின் அரசியல் வெற்றியைப் பாராட்டிப் பிரம்மாண்ட இயக்குநர் ஷங்கர் தனது 'எக்ஸ்' (X) தளத்தில் நெகிழ்ச்சியான பதிவை வெளியிட்டுள்ளார். அதில் அவர் குறிப்பிட்டதாவது:
"இதெல்லாம் சினிமாவில் மட்டுமே சாத்தியம் என்று கூறியதையெல்லாம் தகர்த்தெறிந்து, லட்சியமும் செயலும் ஒன்று சேர்ந்தால் எதுவும் சாத்தியம் என்று நிரூபித்துள்ளீர்கள். மாண்புமிகு முதலமைச்சர் விஜய்-க்கு என்னுடைய மனமார்ந்த வாழ்த்துகள்."
மக்களின் விருப்பம்
மேலும் தனது பதிவில், "மக்களின் விருப்பம் நிறைவேறியிருக்கிறது. ஒரு மாஸ் தொடக்கத்தோடு உங்கள் பயணம் ஆரம்பித்திருக்கிறது. இன்னும் பல உயரங்களைத் தொட வாழ்த்துகள் பிரதர்!" என ஷங்கர் உற்சாகத்துடன் குறிப்பிட்டுள்ளார். நிஜ வாழ்க்கையில் ஒரு 'முதல்வன்' உருவாகியிருப்பதாக ரசிகர்கள் இந்த வாழ்த்தைப் பகிர்ந்து வருகின்றனர்.
0 Comments
No comments yet. Be the first to comment.