தனியார் பள்ளிகளுக்கு அதிரடி உத்தரவு: "அரசு நிர்ணயித்த கல்விக் கட்டண விவரங்களை விளம்பரப்படுத்துவது கட்டாயம்" - தமிழ்நாடு மாநில தகவல் ஆணையம் அதிரடி!
தமிழகத்தில் உள்ள தனியார் பள்ளிகள், அரசு நிர்ணயித்த கல்விக் கட்டண விவரங்களைத் தங்களது பள்ளி வளாகங்கள் மற்றும் தகவல் பலகைகளில் கட்டாயமாக விளம்பரப்படுத்த வேண்டும் எனத் தனியார் பள்ளிகள் இயக்குநருக்குத் தமிழ்நாடு மாநில தகவல் ஆணையம் அதிரடி உத்தரவு பிறப்பித்துள்ளது.
தமிழகத்தில் புதிய கல்வியாண்டு தொடங்கவுள்ள நிலையில், தனியார் பள்ளிகளில் வசூலிக்கப்படும் கல்விக் கட்டணங்கள் குறித்துப் பல்வேறு புகார்கள் எழுந்து வருகின்றன. இத்தகைய சூழலில், பெற்றோர்களின் நலனைப் பாதுகாக்கும் வகையிலும், வெளிப்படைத்தன்மையை உறுதிப்படுத்தும் வகையிலும் தமிழ்நாடு மாநில தகவல் ஆணையம் ஒரு மிக முக்கியமான அதிரடி உத்தரவைப் பிறப்பித்துள்ளது.
மாநில தகவல் ஆணையத்தின் அதிரடி உத்தரவு: தனியார் பள்ளிகள் தங்களுக்குத் தோன்றும் கட்டணங்களை வசூலிப்பதைத் தடுத்து, அரசு முறைப்படி கட்டண நிர்ணயக் குழு மூலம் வகுத்துள்ள கட்டணங்களை மட்டுமே பெற வேண்டும் என்ற விதிமுறை ஏற்கனவே நடைமுறையில் உள்ளது. இதனை மேலும் வலுப்படுத்தும் விதமாகத் தமிழ்நாடு மாநில தகவல் ஆணையம் தற்போது தனியார் பள்ளிகள் இயக்குநருக்குப் புதிய உத்தரவை பிறப்பித்துள்ளது.
அவ்வுத்தரவில் கூறப்பட்டுள்ளதாவது:
"அரசு முறைப்படி தனியார் பள்ளிகளுக்கு நிர்ணயித்துள்ள கல்விக் கட்டண விவரங்களை, அந்தந்த பள்ளிகள் பொதுமக்களுக்கும் பெற்றோர்களுக்கும் தெரியும் வகையில் கட்டாயமாக விளம்பரப்படுத்த வேண்டும். தனியார் பள்ளிகளில் இந்த கட்டண விவரங்களை விளம்பரப்படுத்துவதைத் துறை ரீதியாகக் கட்டாயமாக்க நடவடிக்கை எடுக்க வேண்டும்."
பல தனியார் பள்ளிகள் அரசு நிர்ணயித்த கட்டணத்தை விடக் கூடுதலாகக் கட்டணம் வசூலிப்பதாகத் தொடர்ந்து குற்றச்சாட்டுகள் எழுந்து வரும் நிலையில், இந்த விளம்பரப்படுத்தும் நடைமுறை கட்டாயமாக்கப்பட்டால் பெற்றோர்கள் விழிப்புணர்வு பெறுவார்கள் எனத் தகவல் ஆணையம் நம்புகிறது. பள்ளியின் நுழைவாயில் அல்லது தகவல் பலகைகளில் (Notice Board) கட்டண விவரங்கள் இடம்பெறுவதன் மூலம் கூடுதல் கட்டணக் கொள்ளைக்கு முற்றுப்புள்ளி வைக்க முடியும் என எதிர்பார்க்கப்படுகிறது.
இந்த உத்தரவைத் தொடர்ந்து, தமிழகத்தில் உள்ள அனைத்து மெட்ரிகுலேஷன் மற்றும் தனியார் பள்ளிகள் இந்த விதிமுறையைச் சரியாகப் பின்பற்றுகின்றனவா என்பதைக் கண்காணிக்கக் கல்வித் துறை அதிகாரிகள் அடங்கிய தனிக்குழுக்கள் அமைக்கப்பட வாய்ப்புள்ளதாகத் தெரிகிறது. அரசின் விதிமுறைகளை மீறி கூடுதல் கட்டணம் வசூலிக்கும் அல்லது கட்டண விவரங்களை மறைக்கும் பள்ளிகளின் உரிமம் ரத்து செய்யப்படலாம் என்றும் எச்சரிக்கப்படுகிறது.
0 Comments
No comments yet. Be the first to comment.