"வரலாற்றைப் படித்தால் தெரிந்திருக்கும், ஸ்கிரிப்டைப் படித்தால் எப்படித் தெரியும்?" – முதலமைச்சர் விஜய்க்கு திமுக எழிலன் காரசார பதிலடி! அரசியல் களத்தில் புதிய புயல்!

தமிழகத்தில் புதிய அரசு பொறுப்பேற்றதைத் தொடர்ந்து ஆளுங்கட்சியான தவெக மற்றும் எதிர்க்கட்சியான திமுக இடையே நாளுக்கு நாள் அரசியல் வார்த்தைப் போர்கள் உச்சக்கட்டத்தை எட்டி வருகின்றன. திருச்சியில் முதலமைச்சர் விஜய் அவர்கள் திமுக தலைமை மீது முன்வைத்த தொடர் விமர்சனங்களுக்குத் தற்பொழுது திமுக தரப்பிலிருந்து மிகத் தீவிரமான எதிர்வினைகள் வரத் தொடங்கியுள்ளன. அந்த வகையில், திமுகவின் எழிலன் செய்தியாளர்களைச் சந்தித்து முதலமைச்சர் விஜய்க்கு அளித்துள்ள பதிலடி தற்பொழுது அரசியல் வட்டாரத்தில் பெரும் பரப்பரப்பை ஏற்படுத்தியுள்ளது.

"வரலாற்றைப் படித்தால் தெரிந்திருக்கும்" – எழிலன் அதிரடி: செய்தியாளர் சந்திப்பில் பேசிய திமுகவின் எழிலன், முதலமைச்சர் விஜய் அவர்களின் பேச்சுக்குக் கடுமையான கண்டனங்களைப் பதிவு செய்தார். "திராவிட இயக்கத்தின் மிக முக்கிய அடையாளமான சுயமரியாதை திருமண மேடைகள் தான் எப்போதும் திமுகவின் முதன்மையான பிரச்சார மேடைகளாக விளங்கி வருகின்றன. இந்த இயக்கத்தின் வரலாற்றை முறைப்படி படித்திருந்தால் முதலமைச்சருக்கு இது தெரிந்திருக்கும். ஆனால், வரலாற்றைப் படிக்காமல் யாரோ எழுதிக் கொடுக்கும் வெறும் ஸ்கிரிப்டை (Script) மட்டும் படித்தால் இதெல்லாம் எப்படித் தெரியும்?" என்று முதலமைச்சர் விஜய்யை மிக நேரிடையாகவும் காரசாரமாகவும் விமர்சித்தார்.

ஸ்டாலின் புலம்புகிறார் என்ற விமர்சனத்திற்குப் பதிலடி: திருமண விழாவிற்குச் சென்ற திமுக தலைவர் மு.க.ஸ்டாலின் அங்கேயும் அரசியல் பேசுகிறார், புலம்புகிறார் என்று முதலமைச்சர் விஜய் முழங்கியதற்கு எழிலன் தனது பாணியில் தெளிவான விளக்கம் அளித்தார். தந்தை பெரியார், பேரறிஞர் அண்ணா காலத்திலிருந்தே திருமண மேடைகளில் கொள்கை பரப்புவதும், மக்கள் விழிப்புணர்வை ஏற்படுத்துவதும் திராவிட இயக்கத்தின் மரபு என்று குறிப்பிட்ட அவர், அதனைப் புலம்பல் என்று கொச்சைப்படுத்துவது அரசியல் முதிர்ச்சியற்ற தன்மை என்று சாடினார்.

சூடேறும் திராவிட – தவெக அரசியல் பலப்பரீட்சை: புதிய அரசு அமைந்த பிறகும் திமுக மற்றும் தவெக ஆகிய இரு துருவங்களுக்கு இடையே நிலவும் இந்த நேரடித் மோதல்கள் தமிழக அரசியல் களத்தை அடுத்த கட்டத்திற்கு நகர்த்தியுள்ளன. திமுகவின் கொள்கைப் பின்னணியையும், வரலாற்றையும் சுட்டிக்காட்டி எழிலன் முன்வைத்துள்ள இந்த "ஸகிரிப்ட்" விமர்சனம் தற்பொழுது சமூக வலைத்தளங்களிலும், அரசியல் மேடைகளிலும் விவாதப் பொருளாக மாறியுள்ளது.