'லவ் ஓ லவ்' படத்தை கிழித்தெடுத்த ப்ளூ சட்டை மாறன்... "உங்களுக்கும் மொட்டை அடித்துவிடுவார்கள்" என கடும் விமர்சனம்!

தனுஷின் மருமகனும் இளம் நடிகருமான பவிஷ் கதாநாயகனாக நடித்துள்ள 'லவ் ஓ லவ்' திரைப்படம் சமீபத்தில் திரையரங்குகளில் வெளியானது. மகேஷ் ராஜேந்திரன் இயக்கியுள்ள இந்தப் படத்தில் வனிதா விஜயகுமார் உள்ளிட்ட பலர் முக்கிய கதாபாத்திரங்களில் நடித்துள்ளனர். காதல் கதையை மையமாகக் கொண்டு உருவாகியிருந்த இந்தப் படம் வெளியீட்டுக்கு முன்பு ஓரளவு எதிர்பார்ப்பை ஏற்படுத்தியிருந்தாலும், வெளியான பிறகு ரசிகர்களிடையே கலவையான விமர்சனங்களையே பெற்றுள்ளது.

இந்த நிலையில், தனது நேரடியான மற்றும் சர்ச்சைக்குரிய விமர்சனங்களுக்கு பெயர் பெற்ற பிரபல யூடியூப் திரை விமர்சகர் ப்ளூ சட்டை மாறன், லவ் ஓ லவ் திரைப்படம் குறித்து வெளியிட்டுள்ள விமர்சன வீடியோ சமூக வலைதளங்களில் அதிக கவனத்தை ஈர்த்துள்ளது. படத்தை பாராட்டுவதற்கு பதிலாக, அதன் கதைக்களம், திரைக்கதை மற்றும் காட்சியமைப்பை மிகவும் கடுமையாக விமர்சித்துள்ளார்.

விமர்சனத்தின் தொடக்கத்திலேயே, 'லவ் ஓ லவ்' என்ற தலைப்பைப் பார்த்தால் இது ஒரு ஆழமான காதல் கதையாக இருக்கும் என்று ரசிகர்கள் நினைப்பார்கள். ஆனால் படத்தில் கதாநாயகன் கதாநாயகியை பார்த்தவுடன் காதலை தெரிவிக்கிறார். அதன்பிறகு இருவருக்கும் இடையே இயல்பான காதல் வளர்ச்சி எதுவும் இல்லாமல், கதாநாயகி தொடர்ந்து கதாநாயகனை பொருட்கள் வாங்க வைப்பதும், கடன் வாங்கும் நிலைக்கு தள்ளுவதும்தான் கதையாக மாறிவிடுகிறது என்று மாறன் கூறியுள்ளார்.

மேலும், கதையில் ஒருகட்டத்தில் கதாநாயகன் இதற்கு மேல் தொடர முடியாது என்று கூறும்போது, கதாநாயகி உறவை தொடர வேண்டும் என்று வற்புறுத்துகிறார். அதற்கு பதிலாக, "நான் செய்ததைப் போல நீயும் செய்" என்று கதாநாயகன் கூறுவதும், அதன்பின்னர் மொட்டை அடிப்பதை மையமாக வைத்து கதை நகர்வதும் எந்தவித தர்க்க ரீதியிலும் பொருந்தவில்லை என அவர் சாடியுள்ளார்.

இதுகுறித்து தனது விமர்சனத்தில், பொதுவாக காதல் படங்களில் பிரிவு, தியாகம் அல்லது உணர்ச்சிகரமான திருப்பங்கள் இருக்கும். ஆனால் இந்தப் படத்தில் தொடர்ந்து "மொட்டை அடிப்பது" தொடர்பான காட்சிகளையே மையமாக வைத்து கதையை நகர்த்தியிருப்பது பார்வையாளர்களை சோதிக்கும் வகையில் இருப்பதாக அவர் குறிப்பிட்டார்.

அதேபோல், காதலில் ஏமாற்றப்பட்டவர்கள் காவல் நிலையம் அல்லது ஆணையர் அலுவலகத்தில் புகார் அளித்த உண்மை சம்பவங்களை எடுத்துக்காட்டிய அவர், அதனை மையமாக வைத்து நல்ல திரைக்கதையை உருவாக்கியிருக்கலாம். ஆனால் இந்தப் படத்தில் எந்தவித நேர்த்தியும் இல்லாமல் காட்சிகள் அமைக்கப்பட்டுள்ளன என்று குற்றம்சாட்டினார்.

திரைக்கதை குறித்து மேலும் பேசிய ப்ளூ சட்டை மாறன், "எந்தக் கதையையும் சுதந்திரமாக சொல்லலாம். ஆனால் அதில் ஒரு ஒழுங்கும், நம்பகத்தன்மையும், திரைக்கதை நேர்த்தியும் இருக்க வேண்டும். இந்தப் படத்தில் அவை எதுவும் இல்லை. காட்சிகள் ஒன்றோடொன்று தொடர்பில்லாமல் நகர்கின்றன. பார்வையாளர்களுக்கு எந்த உணர்ச்சியையும் ஏற்படுத்தாமல், பொறுமையை சோதிக்கும் வகையில் படம் நகர்கிறது" என்று விமர்சித்துள்ளார்.

இயக்குநர் மகேஷ் ராஜேந்திரனின் இயக்கத்தையும் அவர் கடுமையாக விமர்சித்தார். படத்தை மிகவும் மோசமாக உருவாக்கியுள்ளதாகவும், "ஒரு சிறிய குழந்தையிடம் கேமராவைக் கொடுத்திருந்தாலும் இதைவிட சிறப்பாக எடுத்திருக்கும்" என்று நக்கலாகக் கூறியுள்ளார்.

இறுதியாக தனது விமர்சனத்தை முடிக்கும் போது, "ஒருத்தருக்கு ஒருத்தர் மொட்டை அடிப்பதையே படமாக எடுத்திருக்கிறார்கள். இந்தப் படத்தை பார்க்கப் போகிறவர்கள் உஷாராக இருங்கள். உங்களுக்கும் மொட்டை அடித்துவிடப் போகிறார்கள்" என்று நையாண்டியாக கூறியுள்ளார்.

ப்ளூ சட்டை மாறனின் இந்தக் கடுமையான விமர்சனம் தற்போது சமூக வலைதளங்களில் பரவலாக பகிரப்பட்டு வருகிறது. ஒருபுறம் அவரது கருத்துக்கு ஆதரவு தெரிவிக்கும் ரசிகர்கள் இருந்தாலும், மறுபுறம் படத்தை ஒரு பொழுதுபோக்கு படைப்பாக மட்டுமே பார்க்க வேண்டும் என்று கூறி சிலர் எதிர்ப்பும் தெரிவித்து வருகின்றனர்.

விமர்சனங்கள் எப்படி இருந்தாலும், லவ் ஓ லவ் திரைப்படம் குறித்து இணையத்தில் தொடர்ந்து விவாதங்கள் நடைபெற்று வருவது குறிப்பிடத்தக்கது. படத்தின் வசூல் மற்றும் ரசிகர்களின் நீண்டகால வரவேற்பு எப்படி இருக்கும் என்பது வரும் நாட்களில் தெரியவரும்.