மதுராந்தகம், தாராபுரம் இடைத்தேர்தல்களுக்கு தடை இல்லை: சென்னை ஐகோர்ட்டு உத்தரவு!

தேர்தல் முடிவுகள் வெளியாகி குறுகிய காலத்திற்குள், மக்கள் தீர்ப்பைப் புறக்கணித்துவிட்டு சுயநல அரசியல் காரணங்களுக்காக எம்.எல்.ஏ. பதவிகளை ராஜினாமா செய்பவர்கள் மீண்டும் இடைத்தேர்தலில் போட்டியிடும்போது, அவர்களது தேர்தல் செலவை டெபாசிட் செய்யும் வகையில் முறையான விதிகளை உருவாக்கக் கோரி சென்னை சைதாப்பேட்டையைச் சேர்ந்த வழக்கறிஞர் சுதன் என்பவர் சென்னை உயர் நீதிமன்றத்தில் பொதுநல வழக்கு ஒன்றைத் தாக்கல் செய்திருந்தார்.

அந்த மனுவில், "இந்த வழக்கு முடிவடையும் வரை மதுராந்தகம் மற்றும் தாராபுரம் தொகுதி இடைத்தேர்தல்களை நடத்த இடைக்காலத் தடை விதிக்க வேண்டும்; மேலும், இத்தொகுதிகளின் த.வெ.க (தமிழக வெற்றிக் கழகம்) வேட்பாளர்களாக அறிவிக்கப்பட்டுள்ள முன்னாள் எம்.எல்.ஏ-க்கள் மரகதம் குமரவேல் மற்றும் சத்தியபாமா ஆகியோரின் வேட்புமனுக்களைத் தேர்தல் ஆணையம் ஏற்கக் கூடாது" என்றும் கோரிக்கை விடுக்கப்பட்டிருந்தது.

மக்கள் நம்பிக்கையை வீழ்த்திய எம்.எல்.ஏ-க்கள்:

இந்த வழக்கு நீதிபதிகள் எஸ்.எம்.சுப்பிரமணியம் மற்றும் கிருஷ்ணசாமி கோவிந்தராஜன் ஆகியோர் அடங்கிய அமர்வில் விசாரணைக்கு வந்தது. அப்போது மனுதாரர் தரப்பில், "எந்தவித தகுந்த காரணமும் இல்லாமல் குறுகிய காலத்திலேயே எம்.எல்.ஏ-க்கள் ராஜினாமா செய்துள்ளனர். இதனால் தேவையற்ற சூழல் உருவாகி, மக்கள் வரிப்பணத்தை மீண்டும் வீணடித்து தேர்தல் நடத்த வேண்டிய நிலை ஏற்பட்டுள்ளது. வாக்களித்த மக்களின் விரலில் வைக்கப்பட்ட மை காயும் முன்பே, சுயநலத்திற்காக ராஜினாமா செய்து மக்களை மற்றொரு தேர்தலைச் சந்திக்க வைத்துள்ளனர். இது மக்களின் நம்பிக்கையை அடியோடு வீழ்த்தும் செயலாகும். எனவே, அரசியல் சாசனத்தின்படி தேர்தல் ஆணையத்தையும் நீதிமன்றத்தையும் முறைப்படுத்தக் கோரி இந்த இடைத்தேர்தலுக்குத் தடை விதிக்க வேண்டும்" என மிகக் கடுமையான வாதங்கள் முன்வைக்கப்பட்டன.

நீதிபதிகள் கண்டனம் - தடை விதிக்க மறுப்பு:

வாதங்களைக் கேட்ட நீதிபதிகள், "எம்.எல்.ஏ-க்கள் தங்களது பதவியை ராஜினாமா செய்ய முழு உரிமை உள்ளது. எனினும், மக்கள் வாக்கு செலுத்தி தேர்ந்தெடுத்த மக்கள் பிரதிநிதிகள், உரிய காரணங்கள் ஏதுமின்றி இப்படி திடீரென ராஜினாமா செய்வது வாக்களித்த மக்களை அவமதிக்கும் செயலாகும். இது ஒட்டுமொத்த ஜனநாயகத்தையும் கேலிக்கூத்தாக்குவது போல் உள்ளது. இதுபோன்ற சூழல்களை எதிர்கொள்ள தேர்தல் ஆணையத்திடம் ஏதேனும் விதிகள் உள்ளதா? மக்களின் உரிமைகளைத் தேர்தல் ஆணையம் கண்டிப்பாகப் பாதுகாக்க வேண்டும்" என்று குறிப்பிட்டனர். அதே நேரத்தில், "தேர்தல் அறிவிப்பு ஏற்கனவே வெளியாகிவிட்டதால், தற்போது இந்த இடைத்தேர்தல்களுக்குத் தடை விதிக்க முடியாது" என்றும் நீதிபதிகள் திட்டவட்டமாகத் தெரிவித்தனர்.

விசாரணை ஒத்திவைப்பு:

இதனைத் தொடர்ந்து, தேர்தல் ஆணையத் தரப்பில் ஆஜரான வழக்கறிஞர், தற்போது எழுந்துள்ள இந்தச் சூழல் தொடர்பாக விரிவாக ஆய்வு செய்து பதிலளிக்கக் கூடுதல் அவகாசம் வேண்டும் எனக் கேட்டுக்கொண்டார். மேலும், தமிழக அரசுத் தரப்பில் ஆஜரான அட்வகேட் ஜெனரல், "தகுதி நீக்கம் செய்யப்பட்டவர்கள் கூட இடைத்தேர்தலில் போட்டியிட முடியும் எனச் சட்ட விதிகள் சுட்டிக்காட்டுகின்றன. அதோடு, எம்.எல்.ஏ-க்களின் ராஜினாமாவை ஏற்றதை எதிர்த்துத் தொடரப்பட்ட மற்றொரு வழக்கில், தலைமை நீதிபதி அமர்வு தனது தீர்ப்பைத் தள்ளிவைத்துள்ளது" என்பதையும் நீதிமன்றத்தில் சுட்டிக்காட்டினார்.