நாகாலாந்தில் கள்ளச்சாராயம் குடித்ததாக கூறப்படும் சம்பவத்தில் 19 பேர் பலி – SIT அமைத்து தீவிர விசாரணை!
நாகாலாந்தில் சந்தேகத்திற்கிடமான கலப்பட மதுபானத்தை அருந்தியதாக கூறப்படும் சம்பவங்களில் 19 பேர் உயிரிழந்துள்ளனர். செப்டம்பர் 26 நிலவரப்படி, மோகோக்சுங் மாவட்டத்தில் 8 பேரும், துயென்சாங் மாவட்டத்தில் 11 பேரும் உயிரிழந்துள்ளதாக போலீஸ் தகவல்கள் தெரிவிக்கின்றன.
மோகோக்சுங்:
மோகோக்சுங் மாவட்டத்தின் மாங்கொலெம்பா உள்ளிட்ட பகுதிகளில் சந்தேகத்திற்கிடமான மதுபானத்தை அருந்திய சிலருக்கு உடல்நலக் குறைவு ஏற்பட்டதாகவும், தொடர்ந்து உயிரிழப்புகள் பதிவானதாகவும் போலீஸ் தெரிவித்துள்ளது. செப்டம்பர் 25-ம் தேதி நிலவரப்படி மோகோக்சுங் மாவட்டத்தில் மட்டும் உயிரிழப்பு எண்ணிக்கை 8 ஆக உயர்ந்தது. சம்பவத்தைத் தொடர்ந்து மாவட்டம் முழுவதும் போலீசார் சோதனை நடவடிக்கைகளை தீவிரப்படுத்தினர்.
துயென்சாங் மாவட்டத்திலும் இதற்கு முன்பு மதுபானம் அருந்தியதாகக் கூறப்படும் சிலர் மங்கலான பார்வை, கடுமையான தலைவலி, தலைச்சுற்றல், வாந்தி, மூச்சுத்திணறல் உள்ளிட்ட அறிகுறிகளுடன் மருத்துவமனையில் அனுமதிக்கப்பட்டனர். அங்கு உயிரிழப்புகள் பதிவாகியதைத் தொடர்ந்து போலீசார் விசாரணையை தொடங்கினர்.
மெத்தனால் இருப்பது கண்டுபிடிப்பு!
துயென்சாங் சம்பவத்துடன் தொடர்புடையதாக கைப்பற்றப்பட்ட மதுபான மாதிரிகளில் மெத்தனால் இருப்பது ஆய்வகப் பரிசோதனையில் கண்டறியப்பட்டுள்ளது. ஆனால் அந்த மாதிரிகளில் மெத்தனால் எவ்வளவு அளவில் இருந்தது என்பதை தற்போதைய பரிசோதனையில் நிர்ணயிக்க முடியவில்லை. இதற்காக மாதிரிகள் மேலதிக அளவீட்டு பரிசோதனைக்காக கவுகாத்தியில் உள்ள மத்திய தடய அறிவியல் ஆய்வகத்துக்கு அனுப்பப்பட்டுள்ளன.
சிறப்பு விசாரணைக்குழு அமைப்பு
சம்பவத்தின் பின்னணி மற்றும் மதுபானம் எங்கிருந்து வந்தது என்பதை கண்டறிய நாகாலாந்து போலீசார் சிறப்பு விசாரணைக்குழுவை (SIT) அமைத்துள்ளனர். கூடுதல் காவல் கண்காணிப்பாளர் I. Bunglang Chang தலைமையில் இந்தக் குழு செயல்பட்டு வருகிறது.
சந்தேகத்திற்கிடமான மதுபானத்தின் உற்பத்தி, போக்குவரத்து, விநியோகம் மற்றும் விற்பனைச் சங்கிலி குறித்து விசாரணை நடைபெற்று வருகிறது. விசாரணையில் சில தகவல்கள் கிடைத்துள்ளதாகவும், ஆனால் அவற்றை தற்போது வெளியிடுவது முன்கூட்டியதாக இருக்கும் என்றும் போலீஸ் அதிகாரிகள் தெரிவித்துள்ளனர்.
19 பேர் கைது – ஆயிரக்கணக்கான மதுபான பாட்டில்கள் பறிமுதல்
சம்பவத்தைத் தொடர்ந்து மோகோக்சுங் மாவட்டத்தின் பல்வேறு பகுதிகளில் போலீசார் அதிரடி சோதனைகளை மேற்கொண்டனர். இந்த நடவடிக்கைகளில் 19 பேர் கைது செய்யப்பட்டுள்ளதாகவும், சுமார் 3,000 மதுபான பாட்டில்கள் மற்றும் பிற மதுபானப் பொருட்கள் பறிமுதல் செய்யப்பட்டுள்ளதாகவும் போலீஸ் தெரிவித்துள்ளது.
Popular News
View All
0 Comments
No comments yet. Be the first to comment.