புதுச்சேரி CBSE பள்ளிகளில் பிரெஞ்சு மொழி நீக்கம்: புதிய கல்வி கொள்கையினால் வந்த அதிரடி மாற்றம்!
மத்திய அரசின் புதிய கல்வி கொள்கையின்படி, மும்மொழி பாடத்திட்டத்தில் ஏற்படும் மாற்றங்களால் புதுச்சேரி சிபிஎஸ்இ பள்ளிகளில் பிரெஞ்சு மொழி பாடம் நீக்கப்படுகிறது.
பிரெஞ்சு கலாச்சாரத்தின் அடையாளமாகத் திகழும் புதுச்சேரியில், கல்வித் துறையில் ஒரு முக்கிய மாற்றம் நிகழ்ந்துள்ளது. வருகின்ற 2026-27 புதிய கல்வியாண்டு முதல், புதுச்சேரி யூனியன் பிரதேசத்தில் உள்ள சிபிஎஸ்இ (CBSE) பள்ளிகளில் பிரெஞ்சு மொழிப் பாடத்திட்டம் நீக்கப்பட உள்ளதாகத் கல்வித் துறை வட்டாரங்கள் தெரிவிக்கின்றன.
மத்திய அரசு கொண்டு வந்துள்ள புதிய கல்விக் கொள்கையின் (NEP 2020) விதிகளின்படி, மும்மொழிப் பாடத்திட்டம் (Three Language Formula) அமல்படுத்தப்படுகிறது. இதன்படி, ஒரு மாணவர் ஒரு வெளிநாட்டு மொழியை மட்டுமே கற்க அனுமதி உண்டு. பெரும்பாலான பள்ளிகளில் ஆங்கிலம் முதன்மை வெளிநாட்டு மொழியாகப் பயிற்றுவிக்கப்படுவதால், பிரெஞ்சு மொழியைத் கூடுதல் மொழியாகத் தொடர்வதில் சிக்கல் எழுந்துள்ளது.
புதுச்சேரியின் பாரம்பரியத்தோடும், வரலாற்றோடும் 300 ஆண்டுகளுக்கும் மேலாகப் பின்னிப் பிணைந்துள்ள மொழி பிரெஞ்சு. இதுவரை பல பள்ளிகளில் இது ஒரு விருப்பப் பாடமாக இருந்து வந்தது. தற்போது சிபிஎஸ்இ பாடத்திட்டத்தை முழுமையாக அமல்படுத்தும் பள்ளிகளில், மும்மொழிப் பாடத்திட்டத்தின் விதிகளால் பிரெஞ்சு மொழிக்கு இடமில்லாமல் போகிறது.
இந்த முடிவினால் வரும் கல்வியாண்டு முதல் சிபிஎஸ்இ பள்ளிகளில் பயிலும் மாணவர்கள் பிரெஞ்சு மொழியைப் பாடமாகத் தேர்வு செய்ய முடியாது. இது உயர்கல்விக்காக பிரான்ஸ் போன்ற ஐரோப்பிய நாடுகளுக்குச் செல்லத் திட்டமிட்டுள்ள மாணவர்களிடையே பெரும் அதிர்ச்சியை ஏற்படுத்தியுள்ளது. "எங்கள் மண்ணின் அடையாளமாக இருக்கும் மொழியைப் பள்ளிகளில் கற்க முடியாமல் போவது வருத்தமளிக்கிறது" எனப் பெற்றோர்கள் கருத்து தெரிவித்துள்ளனர்.
இந்த விவகாரம் தொடர்பாகப் புதுச்சேரி அரசு மற்றும் கல்வித் துறை ஏதேனும் சிறப்பு விலக்கு கோருமா என்பதைப் பொறுத்திருந்துதான் பார்க்க வேண்டும். மாநிலப் பாடத்திட்டத்தைப் பின்பற்றும் பள்ளிகளில் இப்போதைக்கு இந்த மாற்றம் இருக்காது என்றாலும், சிபிஎஸ்இ பள்ளிகளில் இந்த நடைமுறை கட்டாயமாக்கப்பட உள்ளது.
0 Comments
No comments yet. Be the first to comment.