வாக்கு எண்ணும் மையத்தில் பரபரப்பு: சிசிடிவி அறையில் அமர்ந்து 'ஜனநாயகன்' படம் பார்த்த நபர் கைது!

ஸ்ட்ராங் ரூம் பாதுகாப்பில் குளறுபடியா?

தமிழகத்தில் தேர்தல் முடிவடைந்த நிலையில், வாக்குப்பதிவு இயந்திரங்கள் சென்னை அண்ணா பல்கலைக்கழகத்தில் உள்ள பலத்த பாதுகாப்புடன் கூடிய 'ஸ்ட்ராங் ரூமில்' (Strong Room) வைக்கப்பட்டுள்ளன. இங்கு 24 மணி நேரமும் துப்பாக்கி ஏந்திய போலீசார் மற்றும் சிசிடிவி கேமராக்கள் மூலம் தீவிர கண்காணிப்பு பணிகள் நடைபெற்று வருகின்றன. இந்நிலையில், இந்த பாதுகாப்பு வளையத்திற்குள் நிகழ்ந்த ஒரு சம்பவம் பெரும் அதிர்ச்சியை ஏற்படுத்தியுள்ளது.

கண்காணிப்பு அறையில் 'ஜனநாயகன்' படம்

வாக்கு எண்ணும் மையத்தின் பாதுகாப்பை உறுதி செய்ய அமைக்கப்பட்டுள்ள சிசிடிவி கண்காணிப்பு அறையில், திருவாரூர் மாவட்டத்தைச் சேர்ந்த யுவராஜ் என்பவர் பணியில் இருந்துள்ளார். இவர் அங்குள்ள லேப்டாப்பில் சமீபத்தில் வெளியான நடிகர் விஜய்யின் 'ஜனநாயகன்' திரைப்படத்தைப் பார்த்துக் கொண்டிருந்ததாகத் தெரிகிறது. மிக முக்கியமான பாதுகாப்பு அறையில் அமர்ந்து கொண்டு சினிமா பார்த்தது பெரும் விதிமீறலாகப் பார்க்கப்படுகிறது.

சமூக வலைதளத்தில் பதிவிட்ட புகைப்படம்

யுவராஜ் படம் பார்த்ததோடு மட்டுமில்லாமல், சிசிடிவி கண்காணிப்பு திரை மற்றும் தான் லேப்டாப்பில் படம் பார்க்கும் காட்சியைப் புகைப்படம் எடுத்து தனது சமூக வலைதளப் பக்கத்திலும் பதிவிட்டுள்ளார். இந்தப் புகைப்படம் இணையத்தில் வைரலாகி, அரசியல் வட்டாரங்களிலும் தேர்தல் ஆணையத்தின் கவனத்திற்கும் சென்றது. வாக்கு இயந்திரங்கள் இருக்கும் இடத்தின் பாதுகாப்பு குறித்து இது பல்வேறு கேள்விகளை எழுப்பியது.

அதிரடி கைது நடவடிக்கை

இது குறித்து தகவல் அறிந்த பாதுகாப்பு அதிகாரிகள் மற்றும் தேர்தல் அதிகாரிகள் உடனடியாக விசாரணை நடத்தினர். தேர்தல் விதிமுறைகளை மீறியது மற்றும் பாதுகாப்புப் பணியில் கவனக்குறைவாக இருந்தது ஆகிய புகார்களின் கீழ், திருவாரூரைச் சேர்ந்த யுவராஜை போலீசார் அதிரடியாகக் கைது செய்தனர். அவரிடம் இருந்த லேப்டாப் மற்றும் செல்போன் பறிமுதல் செய்யப்பட்டுள்ளது.

வலுக்கும் கண்டனங்கள்

வாக்கு எண்ணும் மையங்களுக்குள் வெளியாட்கள் நுழைய தடை விதிக்கப்பட்டுள்ள நிலையிலும், அங்கு பணிபுரிபவர்களே இது போன்ற பொறுப்பற்ற செயல்களில் ஈடுபடுவது ஜனநாயகத்தின் மீதான நம்பிக்கையைச் சிதைப்பதாகப் பல்வேறு அரசியல் கட்சியினர் கண்டனம் தெரிவித்து வருகின்றனர். இச்சம்பவத்தைத் தொடர்ந்து அண்ணா பல்கலைக்கழக வாக்கு எண்ணும் மையத்தில் பாதுகாப்பு மேலும் பலப்படுத்தப்பட்டுள்ளது.