"ரூ. 200 கோடி வசூல் வரும்னு நினைச்சேன்.. ஆனா!" - LiK தோல்வி குறித்து உருக்கமாகப் பேசிய விக்னேஷ் சிவன்!
இயக்குநர் விக்னேஷ் சிவன் இயக்கத்தில் பிரதீப் ரங்கநாதன் நடித்த 'லவ் இன்சூரன்ஸ் கொம்பனி' (LiK) திரைப்படம் எதிர்பார்த்த வெற்றியைப் பெறாதது குறித்து, இயக்குநர் விக்னேஷ் சிவன் முதல்முறையாக மனம் திறந்து பேசியுள்ளார்.
'லவ் டுடே' படத்தின் பிரம்மாண்ட வெற்றிக்குப் பிறகு, இளைஞர்களின் ஃபேவரைட் நாயகனாக உருவெடுத்த பிரதீப் ரங்கநாதன் நடிப்பில் மிகுந்த எதிர்பார்ப்புடன் வெளியானது 'லவ் இன்சூரன்ஸ் கொம்பனி' (LiK). விக்னேஷ் சிவன் இயக்கத்தில் உருவான இந்தப் படம், கண்டிப்பாக ரூ. 100 கோடி கிளப்பில் இணையும் என சினிமா வர்த்தக வட்டாரங்கள் கணித்தன. ஆனால், கலவையான விமர்சனங்கள் காரணமாக இப்படம் பாக்ஸ் ஆபீஸில் சரிவைச் சந்தித்தது.
மனம் திறந்த விக்னேஷ் சிவன்
படத்தின் தோல்வி குறித்து சமீபத்திய பேட்டி ஒன்றில் பேசிய இயக்குநர் விக்னேஷ் சிவன், தனது ஏமாற்றத்தை வெளிப்படையாகப் பகிர்ந்து கொண்டார். அதில் அவர் கூறியதாவது:
"நான் ஒரு கனவுடன் வந்தேன். அது சிறியதோ அல்லது பாதுகாப்பானதோ அல்ல; அது ஒரு நம்பிக்கையின் புயல். இந்தக் கதை கோடிக்கணக்கான மக்களிடம் எதிரொலிக்கும், திரையரங்குகளை அதிரவைக்கும் என்று நம்பினேன். ரசிகர்கள் கைதட்டுவதையும், சிரிப்பதையும் திரையரங்குகளில் பார்த்தேன். ஆனால், வசூல் ரீதியாக இன்னும் ரூ. 100 கோடி மைல்கல்லைத் தொடவில்லை."
ரூ. 200 கோடி கனவு!
தொடர்ந்து பேசிய அவர், "உண்மையைச் சொல்லப்போனால், நான் ரூ. 200 கோடி வசூலை கற்பனை செய்திருந்தேன். ஆனால், எங்கோ ஏதோ ஒன்று சரியாகப் பொருந்தவில்லை. ஏதோ ஒன்று கைகூடவில்லை என்பது புரிகிறது. இறுதி முடிவு சற்று வருத்தமாக இருந்தாலும், இந்தப் படம் வெளியாவதே எனக்கு ஒரு பிளாக்பஸ்டர் தான். அதனால் நான் திருப்தியாகவே இருக்கிறேன்" என்றார்.
போராட்டங்கள் நிறைந்த பயணம்
வெற்றியை விட கேள்விகள் அதிகமாக இருப்பதை உணர்வதாகக் குறிப்பிட்ட அவர், "புகழை விட உரத்த கேள்விகள் என் முன் உள்ளன. ஆனால் நான் உடைந்து போகவில்லை. இந்தப் படத்திற்குப் பின்னால் யாரும் அறியாத பல போராட்டங்கள் உள்ளன. தூக்கமில்லாத இரவுகள் மற்றும் ஆயிரம் தடைகளைத் தாண்டித்தான் இந்தப் படம் வெளியானது. அது கடவுளுக்கு மட்டுமே தெரியும்" என உருக்கமாகத் தெரிவித்துள்ளார்.
விக்னேஷ் சிவனின் இந்த நேர்மையான பேச்சு சமூக வலைதளங்களில் வைரலாகி வரும் நிலையில், ரசிகர்கள் அவருக்குத் தங்களது ஆதரவைத் தெரிவித்து வருகின்றனர்.
0 Comments
No comments yet. Be the first to comment.