சினிமா இல்லையென்றால் அமெரிக்காவில் செட்டில் ஆகியிருப்பேன்: நடிகை மிர்னாலினி ரவி ஓட்டன் டாக்!
டிக் டாக், டப் ஸ்மாஷ் மூலம் பிரபலமாகி சினிமாவில் நுழைந்த நடிகை மிர்னாலினி ரவி, சினிமாவுக்கு வரவில்லை என்றால் தான் என்ன செய்திருப்பேன் என்பது குறித்து சமீபத்திய பேட்டியில் மனம் திறந்துள்ளார்.
டிக் டாக் மற்றும் டப்ஸ்மாஷ் வீடியோக்கள் மூலம் ஒட்டுமொத்த சமூக வலைதள ரசிகர்களையும் தன் பக்கம் ஈர்த்தவர் நடிகை மிர்னாலினி ரவி. இதன் மூலம் கிடைத்த பிரபலத்தால், 'சூப்பர் டீலக்ஸ்' திரைப்படத்தின் மூலம் தமிழ் சினிமாவில் என்ட்ரி கொடுத்தார். தொடர்ந்து கோப்ரா, எனிமி, ரோமியோ என பல முக்கியத் திரைப்படங்களில் நடித்து கோலிவுட் மற்றும் டோலிவுட்டில் வளர்ந்து வரும் நடிகையாக வலம் வருகிறார்.
சமீபத்தில் அளித்துள்ள பேட்டி ஒன்றில், தனது திரைப்பயணம் மற்றும் சினிமாவுக்கு வரவில்லை என்றால் என்னவாகியிருப்பேன் என்பது குறித்து பல சுவாரசியமான தகவல்களைப் பகிர்ந்துள்ளார்.
விளையாட்டாகத் தொடங்கி வினையான அதிர்ஷ்டம்!
தன் சினிமா எண்ட்ரி குறித்துப் பேசிய மிர்னாலினி, ஆரம்பத்தில் தான் பட வாய்ப்புகளுக்காக வீடியோக்களை செய்யவில்லை என்று குறிப்பிட்டுள்ளார்.
"நான் விளையாட்டாக செய்த டப்ஸ்மாஷ் வீடியோக்கள் தான் இன்ஸ்டாகிராமில் ரசிகர்களை ஈர்த்து, எனக்கான சினிமா வாய்ப்புகளைப் பெற்றுத் தந்தது. ஆனால், பட வாய்ப்புகளுக்காக நான் அதை செய்யவில்லை. என் அதிர்ஷ்டம் தான் என்னை சினிமாவுக்குள் கொண்டு வந்தது. முதலில் என்னை அனுப்ப தயங்கிய என் பெற்றோர்கள், எப்படியாவது நல்ல பெயர் வாங்குவேன் என்ற நம்பிக்கையில் தான் அனுப்பி வைத்தார்கள்" என்று நெகிழ்ச்சியுடன் கூறியுள்ளார்.
விமர்சனங்களும்... கதாபாத்திரத் தேர்வுகளும்!
ஆரம்பக் காலத்தில் தனக்கு பெரிய அளவில் எதிர்மறை விமர்சனங்கள் வரவில்லை என்று கூறும் மிர்னாலினி, நெருக்கமான காட்சிகளில் நடிப்பது குறித்தும் தனது வெளிப்படையான கருத்தைப் பதிவு செய்துள்ளார்.
சினிமா இல்லைனா என்ன செஞ்சிருப்பேன்?
தொடர்ந்து பேசிய அவர், "என்னை பொறுத்தவரை எனக்கு மனதில் சரி என்று பட்டதை தைரியமாக செய்துவிடுவேன். ஒருவேளை எனக்கு சினிமா வாய்ப்பு கிடைக்காமல், நான் சினிமாவுக்குள் வராமல் இருந்திருந்தால், இந்நேரம் எம்.எஸ். (M.S.) படித்துவிட்டு அமெரிக்காவில் செட்டில் ஆகியிருப்பேன்" என்று தனது மாற்றுத் திட்டம் குறித்தும் கலகலப்பாகப் பேசியுள்ளார்.
எதற்கும் கவலைப்படாத குணம் கொண்ட மிர்னாலினி ரவியின் இந்த எதார்த்தமான பேட்டி தற்போது சமூக வலைதளங்களில் வைரலாகி வருகிறது.
0 Comments
No comments yet. Be the first to comment.