"மெட்ரோவில் இலவச பயணம்" - சென்னை-ஐதராபாத் ஐ.பி.எல் போட்டிக்கு மெட்ரோ நிர்வாகத்தின் அதிரடி சலுகை!
சென்னை சேப்பாக்கம் மைதானத்தில் நாளை நடைபெறும் சென்னை - ஐதராபாத் ஐ.பி.எல் போட்டிக்கான டிக்கெட் வைத்துள்ளவர்கள், சென்னையில் உள்ள எந்தவொரு மெட்ரோ ரயில் நிலையத்திலிருந்தும் அரசினர் தோட்டம் நிலையம் வரை இலவசமாக பயணிக்கலாம் என மெட்ரோ நிர்வாகம் அறிவித்துள்ளது.
சென்னை: ஐ.பி.எல் கிரிக்கெட் ரசிகர்களுக்கு சென்னை மெட்ரோ ரயில் நிர்வாகம் மிக முக்கிய அறிவிப்பு ஒன்றை வெளியிட்டுள்ளது. நாளை சென்னை சேப்பாக்கம் மைதானத்தில் நடைபெறும் சென்னை - ஐதராபாத் அணிகளுக்கு இடையேயான போட்டிக்கான பயணச்சீட்டு (Match Ticket) வைத்திருப்பவர்கள், மெட்ரோ ரயிலில் இலவசமாகப் பயணம் செய்யலாம் என்று அறிவிக்கப்பட்டுள்ளது.
சென்னையில் நாளை (மே 18) சென்னை சூப்பர் கிங்ஸ் மற்றும் சன்ரைசர்ஸ் ஐதராபாத் அணிகள் மோதும் விறுவிறுப்பான ஐ.பி.எல் லீக் போட்டி நடைபெற உள்ளது. இதையொட்டி, சென்னை மெட்ரோ ரயில் நிறுவனம் மற்றும் சென்னை சூப்பர் கிங்ஸ் (CSK) நிர்வாகம் இணைந்து ரசிகர்களின் வசதிக்காக இந்த சிறப்பு ஸ்பான்சர்ஷிப் சலுகையை வழங்கியுள்ளது.
இலவச பயண விவரம்: > போட்டியைக் காண டிஜிட்டல் அல்லது அசல் பயணச்சீட்டு (Match Ticket) வைத்திருக்கும் ரசிகர்கள், சென்னையில் உள்ள எந்தவொரு மெட்ரோ ரயில் நிலையத்திலிருந்தும், சேப்பாக்கம் மைதானத்திற்கு அருகிலுள்ள அரசினர் தோட்டம் (Government Estate) மெட்ரோ ரயில் நிலையம் இடையே முற்றிலும் இலவசமாகப் பயணம் செய்துகொள்ளலாம்.
ரசிகர்கள் தங்களின் போட்டி டிக்கெட்டில் உள்ள பிரத்யேக QR குறியீட்டை மெட்ரோ நிலையங்களின் தானியங்கி நுழைவு வாயில்களில் (AFC Gates) ஸ்கேன் செய்து ஒரு முறை சென்று வரக்கூடிய (Round-Trip - 2 என்ட்ரி மற்றும் 2 எக்சிட்) இந்த வசதியைப் பயன்படுத்திக் கொள்ளலாம்.
மேலும், போட்டி முடிந்து ரசிகர்கள் நள்ளிரவில் வீடு திரும்புவதற்கு வசதியாக, அரசினர் தோட்டம் மெட்ரோ நிலையத்திலிருந்து விம்கோ நகர் பணிமனை மற்றும் சென்னை விமான நிலையம் நோக்கிச் செல்லும் சிறப்பு மெட்ரோ ரயில்கள் நள்ளிரவு 01:00 மணி வரை நீட்டிக்கப்பட்டுள்ளது. இந்த அரிய வாய்ப்பைப் பயன்படுத்தி ரசிகர்கள் போக்குவரத்து நெரிசலைத் தவிர்த்து, பாதுகாப்பான சூழலில் பயணம் செய்யுமாறு சென்னை மெட்ரோ நிர்வாகம் கேட்டுக்கொண்டுள்ளது.
0 Comments
No comments yet. Be the first to comment.