நீட் மரணங்களும்.. திமுக அரசின் சட்டப் போராட்டமும்.. ஆளுநர் முதல் குடியரசுத் தலைவர் வரை நடந்தது என்ன?
நீட் தேர்வு மரணங்களும் அரசியல் மோதல்களும்: திமுக அரசு இதுவரை எடுத்த நடவடிக்கைகள் என்ன? தமிழகத்தில் நீட் தேர்வு விவகாரம் மீண்டும் அரசியல் களத்தில் அனலைப் கிளப்பியுள்ளது. சமீபத்தில் மாணவி தேவதர்ஷினியின் மரணத்தைத் தொடர்ந்து, கடந்த ஐந்து ஆண்டுகளில் நீட் தேர்வால் உயிரிழந்த 19 மாணவர்களின் பட்டியலை தனது 'எக்ஸ்' (X) தளத்தில் பகிர்ந்த எதிர்க்கட்சித் தலைவர் எடப்பாடி பழனிசாமி, "இதற்கு முதல்வர் ஸ்டாலின் சொல்லப்போகும் பதில் என்ன?" என்று காட்டமாக கேள்வி எழுப்பியுள்ளார்.
நீட் தேர்வின் பின்னணி
மத்தியில் திமுக அங்கம் வகித்த காங்கிரஸ் தலைமையிலான ஐக்கிய முற்போக்கு கூட்டணி ஆட்சியின் போதே நீட் தேர்வுக்கான விதைகள் தூவப்பட்டாலும், தமிழகத்தில் 2017-ம் ஆண்டு முதல் தான் நீட் முறை நடைமுறைக்கு வந்தது. அந்த ஆண்டு அரியலூர் மாணவி அனிதா தற்கொலை செய்துகொண்ட சம்பவம் தமிழகத்தையே உலுக்கியது.
இதனைத் தொடர்ந்து, 2021 சட்டமன்றத் தேர்தல் பிரசாரத்தின் போது, "திமுக ஆட்சிக்கு வந்தவுடன் நீட் தேர்விலிருந்து தமிழகத்திற்கு விலக்கு பெறப்படும்" என்ற வாக்குறுதியை அக்கட்சி முன்வைத்தது.
திமுக அரசின் நடவடிக்கைகள்: ஒரு பார்வை
ஆட்சிப் பொறுப்பேற்றதும் திமுக அரசு நீட் விவகாரத்தில் பின்வரும் முக்கிய நடவடிக்கைகளை மேற்கொண்டது:
ஏ.கே.ராஜன் குழு: நீட் தேர்வால் சமூக மற்றும் பொருளாதார ரீதியாக பின்தங்கிய மாணவர்களுக்கு ஏற்படும் பாதிப்புகளை ஆராய ஓய்வுபெற்ற நீதிபதி ஏ.கே.ராஜன் தலைமையில் ஒரு குழு அமைக்கப்பட்டது.
சட்டப்பேரவை மசோதா (2021): அந்த குழுவின் பரிந்துரையின் அடிப்படையில், 2021-ல் தமிழக சட்டப்பேரவையில் நீட் விலக்கு மசோதா ஒருமனதாக நிறைவேற்றப்பட்டது. ஆனால், அப்போதைய ஆளுநர் ஆர்.என்.ரவி இந்த மசோதாவைத் திருப்பி அனுப்பினார்.
மறுமுறை நிறைவேற்றம் (2022): 2022-ல் மீண்டும் அதே மசோதா சட்டப்பேரவையில் நிறைவேற்றப்பட்டு ஆளுநருக்கு அனுப்பப்பட்டது. இந்த முறை ஆளுநர் அதனை குடியரசுத் தலைவரின் ஒப்புதலுக்காக அனுப்பி வைத்தார்.
தற்போதைய நிலை
நீண்ட இழுபறிக்குப் பிறகு, கடந்த ஆண்டு ஏப்ரல் 4-ம் தேதியன்று சட்டப்பேரவையில் உரையாற்றிய முதல்வர் மு.க.ஸ்டாலின், தமிழகத்தின் நீட் விலக்கு மசோதா நிராகரிக்கப்பட்டுவிட்டதாக அதிகாரப்பூர்வமாகத் தெரிவித்தார்.
மசோதா நிராகரிக்கப்பட்ட நிலையிலும், தமிழக மாணவர்களின் நலன் காக்க அடுத்தகட்ட சட்டப் போராட்டங்கள் குறித்து அரசு ஆலோசித்து வருகிறது. இருப்பினும், தொடரும் மாணவர்களின் தற்கொலைகளும், அது குறித்த அரசியல் விமர்சனங்களும் தமிழகத்தில் நீட் எதிர்ப்புக் குரலை மீண்டும் வலுக்கச் செய்துள்ளன.
0 Comments
No comments yet. Be the first to comment.